Indian Council of Agricultural Research (ICAR), Mizoram Centre, Kolasib buaitsaihin vawiin khan Soil &Water Conservation Department Officer-ten Aizawl Club-ah training an nei a. Soil &Water Conservation changtu Minister Pu H. Liansailova chuan he training hi a hawng a ni.

Minister chuan mipuite ei leh bar intodelh leh eizawnna ngelnghet siamsak hi sorkar chuan a ngaihpawimawh berte zing ami a ni a. Mizoram, a ram mipui tam zawk lo neih leh a kaihnawih thildang a eizawngte tan chuan tui hnianghnar a  neih leh thlai that duhna lei hnawng tha neih hi a pawimawh em em a ni, a ti a. Hmarchhak state hrang hrang a kum khat chhunga ruahtui 2000mm bawr vel tla thin chu tha tawk thawkhat viauin lang mahse ruahtui tlak hunlai May leh October inkar bak thla ruk emaw hun chhung hi chuan thlai chawmtu tur ruahtui mumal a awm ngai lo. Chuvang chuan Soil &Water Conservation mithiamten ruahtui khawl (rain water harvesting) leh  artificial recharge an tihte hi a pawimawh em em a, kan thlai chinte pawh kan ram sik leh sa mil kan thlan thiam a pawimawh a ni, Minister chuan a ti a. Tlangram lo neih (Jhum Cultivation) hian nasa takin ram leilung a tichhia a, NLUP hmangin sorkar chuan tlangram lo neih bansana eizawnna ngelnghet leh tha zawk mipuite siamsak tumin tan a la a. A hlawhtlinna tur chuan a taka loneitute hman theih tur thiamna pek a tul a, anmahni zirtir tur hian sorkar mithiamten mawhphurhna sang tak an nei a ni, a ti. Minister chuan training chu officer ten an hlawkpui ngei a duhsak thu leh a taka hmang tur mipuite hnen thleng phak a nih ngei a beisei thu a sawi a ni.

He nikhat awh training hawnna inkhawm hi ICAR, Kolasib Jt. Director Dr. K.A. Pathak chuan a kaihruai a. Agriculture (R&E) Director Dr. O.P. Singh leh Soil &Water Conservation Director Pu Jerome Rokima ten thusawina hun an hmang a. ICAR, Umiam, Meghalaya atangin mithiam Dr. B.U. Choudhury, Dr. Rajkhowa,  Dr. R.K Singh bakah ICAR Kolasib atanging Dr. K.A Pathak, Dr. Y. Ramakrishna leh Sh. Rajasekar-a ten training an pe a ni.