No.4970/2020-2021

Vawiin chawhma khan Indian Council of Agricultural Research, ICAR Research Complex For NEH Region, Mizoram Centre, Kolasib bultumin Tribal Sub Plan hnuaiah “Promotion of Farm Mechanization for Increasing Net System Productivity and Cropping Intensity in Mizoram” tih thupui hmang a hun hman a ni a. Loneitu, hnathawhna khawl leh hmanrua dawng tur a thlan chhuahte nen he hun hi hman niin, Dr H. Lalthlangliana, Deputy Commissioner, Kolasib chu khuallian niin Pu J. Rothanga, District Agriculture Officer chu khual Zahawm a ni bawk a ni.

Khuallian Dr H. Lalthlangliana, Deputy Commissioner chuan Kolasib district chhung a ICAR Research Complex a awm chu Kolasib district chhunga loneitute mai nilovin Mizoram hmun hrang hranga kuthnthawktute tan hmasawnna leh hlawkna nasa tak thlentu a nih mek thu sawiin,” Taimakna hi tunlai thiamna nena hman kawp a nih chuan, hlawkna nasa zawk a awm thin a, loneitu taima leh dinchhuah tuma bei tak takte tan ICAR-a mithiamte rawn tur kan nei hi kan nihlawh hle a ni,” a ti. Kolasib district chhung, Saihapui ‘V’ a Thingrai huan neituten harsatna an tawh chungchanga ICAR, KVK leh Agriculture Department, Kolasib district tangkawp hmalaknain Thingrai huan zau tak chhan hman a nih thu tarlangin, Dr H Lalthlangliana chuan Loneitu kalkhawmte chu a hun tak a mithiamte rawn nachang leh hmang tangkai thiam turin a chah bawk a ni.

Khual zahawm Pu J. Rothanga, District Agriculture Officer chuan Farmer Interest Group leh pawl thenkhat loneihna khawl leh hmanrua dawngte lawmpuina thu sawiin neitu nihna nen an thil dawn chu tha taka enkawl chhunzawm turin a chah a. Mimal anga hmala hlawhtling tam tak hmuh tur an awm lai a Pawl anga hmalakna ah chuan hlawhtling tia chhiar tur an tlem thu a sawi a,”Hei hian pawl anga thawhhona kawngah mizote hian zirtur hmabak kan la ngah hle niin ka hria a, vawiin a pawl anga Loneitu thlanchhuah te hi midang tan a entawntlak ni turin inhlawhtlin ngei ka beisei a ni,” a ti.

Hun kaihruaitu Dr I. Shakuntala, Joint Director, ICAR, Kolasib chuan Mizoram chhung a ICAR hmalakna thenkhatte tarlangin Gramin Krishi Mausam Seva hnuaiah Mizorama kuthnathawktu 28,971 an awm mek a, Crop Weather Bulletin hi Thawhtanni leh Ninganiah tichhuah ziah a nih thu a sawi. Thlai, Ran vulh leh Sangha khawina kawngah zirna hrang hrang kalpui mek a ni a, Buhchangphaiah Sangha leh Vawk vulh kawp hlawk zawka kalpui dan enchhinna neih mek a nih thu a sawi bawk a ni. Dr I. Shakuntala chuan kuthnathawktute sum dehchhuahpui dan ICAR chuan a ngaihtuahpui tel thu sawiin Arecanut Leaf Moulding Machine pawh pawl hrang hrang hnenah pekchhuah a lo nih tawh thu a sawi a, ruahtui khawl a hman tangkai dan (Rainwater harvesting) kalpui niin Green House sak tanpuinate pekchhuah a nih thu a sawi bawk a ni.

Vawiin hian Phaisen Kanan Group, WRC Farmer Association, Lawngtlai leh Chuailo FIG, Saiphai hnenah Power Tiller, Water Pump set leh Pipe hlan an ni a, Serchhip Agriculture and Horticulture Farming Cooperative Society leh Bukvannei a loneitu thalnchhuah pahnihte hnenah Water Pump set leh Pipe hlan a ni bawk a ni.