No.7769/2020-2021
Kolasib Dated 11th March 2021: Vawiin chawhnu khan ICAR, Mizoram Centre hmalakna hnuaiah Tribal Sub Plan kaltlang a lei, artui 600 tih keu theihna Hatchery Unit pahnih chu Village Organisation, Bilkhawthlir North hruaitute hnenah Kolasib district bawrhsap Dr.H.Lalthlangliana chuan a hlan.
Kolasib bawrhsap Dr.H.lalthlangliana chuan ICAR, Mizoram Centre hmalaknaa artui tih keuna khawl Village Organisation, Bilkhawthlir North-in an nei ta chu a lawmpui thu sawiin hmasawn tur leh hlawhtling tur chuan taimak leh tumruhna bakah tunlai thiamna hman tangkai tel a tul thu a sawi. Khawl enkawlna chungchangah ICAR a mithiamte rawn nachang hre turin a chah a, hetih rual hian mobile phone leh internet-te pawh a tangkai zawng a hmang thin turin a chah bawk a ni. Arsa leh artui a intodelhna hmanrua a nih piah lamah eizawnna kawng a mi te tan a entawntlak leh kawng kawhhmuhtu nih tum turin Bilkhawthlir SHG member nu hote chu Khuallian hian a fuih bawk a ni.
Dr. Engkunga Chhangte, DVO, Kolasib pawhin thusawiin Hatchery Unit chu a nihna tur tak a hmang tangkai turin leh arsa leh artui a kan intodelhna hmanrua a nih ngeina turin hmasawn duhna thinlung nen a enkawl turin SHG member-te a fuih bawk a ni.
Dr. Lalhruaipuii, Scientist, ICAR chuan Hatchery Unit hlanna hun hi a kaihruai a, Dr.I.Shakuntala, Joint Director, ICAR, Mizoram Centre-in Tribal Sub Plan hmang a khawl lei a nih dan tlangpui tarlanna hun a nei a. Pu Nengthianlala, BDO Bilkhawthlir chuan Park Veng, Bilkhawthlira Hatchery House sak pum a nih dan te leh nizung chakna hmang a khawl awm te chu enkawl chhunzawm tum a nih thu a tarlang a, Pi Lalthanmawii, President, VO, Bilkhawthlir North SHG atangin thusawi ngaihthlak a ni bawk.
Bilkhawthlir Village Organisation hnen a Hatchery unit pekah hian a rualin artui 600 a awp keu tir theih a, khawl pahnihah hian artui 1200 a rualin a tih keu theih a ni. Vawiin hian Chick guard, brooder, debeaking machine leh arte 750 pawh VO, Bilkhawthlir hnenah hlan nghal a ni bawk a ni.
Attachment
- Loading attachment...
