No.7768/2020-2021

Kolasib Dated 11th March 2021: Vawiin chawhma khan Indian Council of Agricultural Research, ICAR Research Complex for N.E.H Region, Mizoram Centre, Kolasib leh ICAR Directorate on Poultry Research, Hyderabad tangkawpten hlawk zawk leh eizawnna tlak a ar vulh kalpui dan tur inzirtirna, ‘Training programme on Backyard poultry Farming for Socio-Economic Upliftment of Tribal Farmers in Mizoram' hawnna hun chu ICAR Conference Hall, Vengthar, Kolasibah an buatsaih a. Dr.H.Lalthlangliana, Deputy Commissioner, Kolasib district chu khuallian niin Dr. Engkunga Chhangte, District Veterinary Officer chu khual zahawm a ni bawk.

Khuallian Dr.H.Lalthlangliana chuan ramri venna kawnga hmanraw pawimawh ber chu intodelhna a nih thu sawiin intodelh chu mi tin mawhphurna a nih thu leh he mawhphurna hlenchhuak tur hian thawhrimna leh taimakna neih a tul thu a sawi. Kolasib district chu ran vulh nan leh thlai chin nana hmunhma rem tak nei a nih bakah ram pum ang pawh a ei leh bar intodelhna tur a zir bingna hmunpui, ICAR Research Complex a awm avangin kuthnathawktute an vanneih thu a sawi a, a tak a hmang tangkai a dinchhuahpui tu nih tum theuh turin training tur a lo kalte chu a chah bawk a ni.

Dr. Lalhruaipuii, Scientist, ICAR chuan Training hawnna hun hi a kaihruai a, Dr.I.Shakuntala, Joint Director, ICAR, Mizoram Centre chuan training kalpui dan tur tlangpui tarlanna hun neiin Dr. Engkunga Chhangte, DVO, Kolasib chuan ICAR buatsaih training-naa an thil zir leh an thil dawn te chu intodelhna kawng hmahruai a hmang ngei turin kalkhawmte fuihna hun a hmang bawk a ni.

‘Training programme on Backyard Poultry Farming for Socio-Economic Upliftment of Tribal Farmers in Mizoram' hi ni hnih awh tur niin Aizawl, Mamit leh Kolasib atanga ar vulh tur a thlanchhuah mi 150 an tel a ni. Training a telte hnenah hian ar note 30 leh bul tanna tur ar chaw kg 10 theuh pek chhuah a ni. Ar vulh tur a thlan chhuahte hnenah hian ar chaw pekna, Feeder leh tui pekna, Waterer pek vek an ni dawn bawk a, ar note sem chhuah turte hi Vaccine pek an ni bawk a ni. He training-na hunah hian thlai atanga ran chaw tha siam chhuah dan te, Ar vulh chunga sangha vulh kawp dan te, ar natna hrang hrang leh a enkawl dan te bakah a taka tih chhina te neih a ni dawn a ni.