No.7767/2020-2021

Aizawl, 11th  March, 2021 : COVID-19 hri danna (vaccine) pek dan tur ngaihtuahtu “State Task Force for COVID-19 Vaccination” thutkhawm vawi thumna chu an Chairman Pu R.Lalramnghaka, Secretary, Health & Family Welfare Department hovin vawiin chawhma khan SAD Conference Hall, MINECO-ah  neih a ni.

Meeting-ah hian March ni 10, 2021 (Nilaini) thleng khan Mizoramah COVISHIELD dose 1,28,840 (January - 35000, February - 75400, March - 18440) dawn tawh a ni a, vaccine hi January leh February ah vawi 2 ve ve dawn niin March thla hian vawi 1 dawn a ni. Heng zinga dose 5110 hi Central sawrkar hnuaia thawkte tan ruahman a ni.

COWIN 1.0 ah khan database a hming chuangte tan chauh vaccine hi dawn theih a ni a, March ni 1, 2021 khan COWIN 2.0 hman tan niin hetah hi chuan database hman a ni tawh lova, Healthcare workers, Frontline Workers, kum 60 chung lamte leh kum 45 - 59 inkar natna benvawn nei (natna chi hrang hrang 20 chhinchhiah a ni) te tan aadhar card kengin Vaccine pekna hmuna an in register chuan pek nghal an ni a. Natna benvawn neite tan hian daktawr lehkha ken a ngai thung.

March ni 10, 2021 thleng khan Mizoram pumah Healthcare worker 11753 in vaccine 1st dose an la tawh a, an zinga 9797 hian 2nd dose an la tawh a ni. Frontline workers zingah 18534 in 1st dose la tawhin an zinga 2 hian 2nd dose an la tawh a, kum 60 chung lam mi 10199 in 1st dose la tawhin kum 45 - 59 inkar natna benvawn nei mi 825 in 1st dose an la tawh bawk a ni. Healthcare worker in register zinga 75% in vaccine 1st dose an la tawh a, Frontline workers zinga 1st dose la tawh hi 67% an ni bawk. 2011 chhiarpui atanga chhutin kum 60 chunglam vaccine la zat hi 12.78% a ni.

Vaccine 1st dose la tawh te tan an lakna hmun ngai (vaccine centre) ah kher 2nd dose lak a ngai tawh lo tih tarlan a ni a, Mizoram chhung leh pawna vaccine centre khawiah pawh 2nd dose hi a lak theih tawh a ni. Vaccine 1st dose la ten 2nd dose an lak tur hi vaccine dawn tawh sa atangin dahthat nghal zel a ngai a, vaccine hi sawrkar laipui atang dawn belh leh thuai beisei a ni bawk.

Meeting ah hian vaccine pek chhuah kawngah thawktu indaihlohna a nasat em em karah, COVID-19 volunteers engemawzatin hlawh beisei lova an la tanpui avanga an indaihlohna nasa taka chhawk zangkhai a nih chu lawmawm an tih thu tarlan a ni.

Vawiina State Task Force for COVID-19 Vaccination thukhawm chuan Vaccine pek chhuahna ah Tlawmngai pawlten an tawiawm that avanga lawmawm an tih thu sawi a ni a, hmun thenkhatah phei chuan YMA leh LLTF ten kum 60 chunglam ho kalna tur lirthei te an ruahman hial a ni tih tarlan a ni bawk.