Tunkar chhung khan ICAR (Indian Council of Agricultural Research), Mizoram Centre leh Fisheries Department tangkawp chuan Serchhip District chhunga lui te a hmunah kalin an zir chiang hlawm a. An thil hmuh dan tlangpui he ti hian Pu PL Lalrinsanga, Fishery Scientist, ICAR, Mizoram Centre, Kolasib chuan a sawi.

Lui hrang hrang an zirte chu a tui leh lei sample te lain, zirchian chhunzawm zel anih tur thu a sawi. Mizoram lui sangha te nasa taka tih chereu anih avangin kan ram lui sangha chi 6 lai chu boral (extinct) mai thei dinhmunah an ding mek nia sawiin, Nghavang (Semiplotus modestus) leh Nghahrah (Tor tor) te pawh chung zingah chuan an tel, a ti.
 
He zirchianna in a tum ber chu kan ram luidunga tui leh leilung dinhmun zirchian te, sangha boral mai thei leh inthlah pung chaklo bikte tunlai thiamna leh hmanruate hmanga hmun danga chi inthlahpun tir a, chung sangha chite chu an awmna hmun ngaia chhuah leh te, luidung nungchate nasa zawka an lo pun theih dan tur te leh humhalh kawnga nasa zawka hma lakna tur a nih thu Pu PL Lalrinsanga, Fishery Scientist, ICAR, Mizoram Centre, Kolasib hian a sawi a. Nghavawk chi thar ni a hriat hmuh an neih chu chik zawk a zirchian tur a dah a nih thu a tarlang bawk.

Pi Zonuntluangi, DFDO, Serchhip pawhin thusawiin; hetianga kan ram lui te zir chiang tura Mizo mithiam kan nei chu lawmawm a tih thu leh Serchhip District chhunga YMA branch thahnem takin anmahni khua theuhah theih tawp chhuaha luidung humhalh kawngah nasa taka hma an lak mek thu sawiin, tuna mithiamte hmalakna chungchangah pawh branch YMA hrang hrang te’n an humhalh  lui te phal taka an lo hman tir avangin branch YMA te chungah lawmthu a sawi a. YMA te avangin kan luidung ruak tak tak tawhte pawh an lo hlu thar lehin Nungcha chi hrang hrang kan hmuh ngai tawh loh tur emaw kan tih chenin hmuh tur kan nei leh tawh a, a lawmawm tak zet a ni, a ti.