Vawiin khan ICAR-Research Complex for NEH Region, Mizoram Centre, Kolasib buatsaihin Mizoram sawrkar hnuaia Agriculture kaihhnawih department hrang hrang tel na, “Interface meeting on Adaptation Potential of Agricultural Technologies for Doubling Farmers’ Income in Mizoram” chu Aijal Club ah Khuallian, Pu Lalsawta, Finance Minister chuan a hawng a Pu P.C. Lalthanliana, Horticulture Minister chu Khual Zahawm niin, Pu Lalhmingthanga, Commissioner and Secretary, Agri & RD department, Dr. N. Prakash, Director, ICAR Research Complex for NEH Region, Umiam, Meghalaya, Dr. I. Shakuntala, Joint Director, ICAR Research Complex for NEH Region, Mizoram Centre, Kolasib leh Agriculture lam a mithiam thahnem takin an telpui bawk.

Finance Minister Pu Lalsawta chuan Mizoram loneitute hian lo neihdan kalphung hlui kan la hman reng avangin kan hlawk tur ang in kan la hlawk phalo a ni, a ti a, ram mipuiten ei leh bar kan mamawh atanga za a 70 (70%) hi ram pawn atanga lakluh anih avangin hmasawnna tur tam tak kan la bak a ni, a ti. Pu Lalsawta chuan kan loneih dan kalphung hluite hi thiamna thar leh khawl tha zawk hmang a thlak a ngaih thu leh chu chuan hlawk zawk a tharchhuah kawngah loneitute a puih mai bakah eizawnna kawngah loneitute a chawisan ngei a rin thu a sawi bawk. Pu Lalsawta chuan hmasawn leh zel tur chuan ram chhung leh pawn atangin Investor te kan hip luh a hun tawh a, Magnetic Mizoram hmangin kawng hrang hrangah Investor-te nen hmalak mek a ni a, Agriculture ah pawh hian chutianga hmalak chu a hun ve tawh a ni, a ti. Pu Sawta chuan, Sawrkar laipui in kum 2022 hmaa loneitute hlawkna a leta a pun theih nana hmalakna tih puitlin a nih theih nan hma la tlang zel ila, tan ila thar ang u, a ti bawk.

Pu P.C. Lalthanliana chuan ICAR leh department hrang hrang hotute nena tangruala hetiang ang inhmuhkhawmna leh sawihona hun pawimawh an buatsaih thei chu lawmawm a tih thu sawiin zoram mipuite tana chhawrtlak leh hmantlak zawk rah chhuah a awm ngei a beisei thu a sawi. Zoram loneituten ruahtui a an innghah nasat lutuk avang leh leilungah harsatna an neih thin avanga an thar hlawk theihloh thu sawiin, hlawk zawk a tharchhuak tur chuan, Technology thar nen a hmalak a pawimawh a ni, a ti.

Pu Lalhmingthanga, Commissioner and Secretary, Agri & RD Department chuan he meeting pawimawhna sawiin India sawrkar in mipui leh thingtlang kuthnathawktute hmasawnna tur a hma an lak nasat zia a tarlanga, kuthnathawktute harsatna sukiang tur a ICAR in a agriculture leh a kaihnawih department hotute inhmuhkhawmna leh sawihnona hun remchang a buatsaih chu lawmawm a tih thu a sawi bawk.

He meeting hi Dr. N. Prakash, Director, ICAR Research Complex for NEH Region, Umiam, Meghalaya in a kaihruaia, kuthnathawk tute chawisang tur chuan agriculture lam a thiamna tharte hman tangkai a pawimawh zia sawiin department hrang hrang te leh ICAR mithiamte thawh ho  tulzia te a tarlanga, kuthnathawktute harsatna hriatsak leh a sutkian dan tur kawhhmuh a pawimawh hle a ni a ti. 

He meeting ah hian Finance Minister Pu Lalsawta chuan publication panga (5) a tlangzarha, department hrang hrang hotu mi za leh sawm (110) chhimtu an awm a ni. Mizoram Sawrkar hnuaia Agriculture, AH & Vety, Fisheries, Horticulture, Soil and water, Minor irrigation, Sericulture, Commerce and Industries department aiawhte leh College of Veterinary Science, Selesih leh Department dang atanga Secretary leh Director te an tel a, Mizoram in agriculture lama kan harsatna leh hma lak a nih theih dan sawi hona hun hman a ni.