Vawiin khan Mamit khawpui chhung hmun thum DC Conference Hall, Hmarveng, Siamliana Hall, Charkawn leh I&PR Conference Hall, Field Vengah te District Election Office bultumin Mamit khawpui chhunga MUP Member-te tan EVM/VVPAT hman dan inzirtirna hun buatsaih a ni.

He hunah hian kan hma lawka inthlanpui lo awm turah MUP Member-te chuan Vote thlak chungchangah harsatna an neih lohna turin EVM leh VVPAT hman dan inzirtirna neiin Vote thlak chhinna neihtir an ni a. EVM leh VVPAT-te chu an rintlak tawkzia pholanna neih a nih bakah inthlanna atana thil tul dang pawimawh hrang hrangte inhrilhhriatna hun hman a ni.

MUP-te tana EVM/VVPAT hman dan inzirtirna DC Conference Hall-a neihah hian Pu Zothansanga, BLO-in zirtirna a pe a. Siamliana Hall-ah Pu Chinlianmanga, SDC, Mamit-in zirtirna pein I&PR Conference Hall-ah hian Pu Lalrinsanga Hnamte, SDC, Mamit-in zirtirna a pe a. Khawpui chhunga MUP Member-te an tel tha hle a ni.