Indian Chamber of Commerce (ICC) atanga lokal, West India Office enkawltu Pi Sharmila Banerjee chuan vawiin chawhma khan Mizoram Governor Lt. Gen. Nirbhay Sharma PVSM, UYSM, AVSM, VSM (Retd.) chu Raj Bhavan-ah hmu in, ICC kaltlanga company lianten Mizorama investment an neih theihna turte an sawi dun.

Governor Lt. Gen. Nirbhay Sharma chuan ICC chu India rama sumdawnna tihhmasawn tumte pawl zinga upa ber a nih angin, India khawmualpuia hmarchhak ramte tilar (promote) theitu a ni a ti a. Sawrkar laipui Act East Policy nen pawh a inrem hle tiin, Mizoram leh hmarchhak ramte bakah Myanmar leh Thailand te thlenga insumdawn tawnna ruahman thei se a ti . Mizoram Governor chuan investor-te chu Mizoramah rawn kal hmasain eng lam hawi zawnga investment siam chi nge rawn enfiah thei se a ti a. A tawnhriat atanga Mizoram chuan hmarchhak ramte zinga potential nei tha ber nia a hriat thu a sawi a ni. Tourism, agriculture leh horticulture ah te hma la in, Mizo mipuite tana eizawnna ngelnghet siamtu a nih tur thu a sawi bawk a ni.

Pi Sharmila Banerjee pawhin Maharashtra leh Mizoram sawrkar hotute nena an indawr dan chungchang sawiin, sawrkar aiawh, investor leh kuthnathawktu pawl hotu te tana inhmuhkhawmna Mumbai khawpuia an buatsaih tur thu a sawi a. ICC hnuaiah hmarchhak ramte tana investment zirchiang tur bik, Core Group an din thu leh January Ni 11-a Mumbai khawpuia ICC Business Summit an neih turah pawh programme mumal tak hmarchhak ramte tana duangsa hawn hman ngei an duh thu a sawi a ni. Tourism chawikang tura tour operator hrang hrangte nena an inbiak thu a sawi bawk a ni.