Vawiin khan ICFAI University chuan an University Campus, Durtlang North ah an convocation hmasa ber an hmang. Larsap Pu Vakkom Purusothaman, he University-a Visitor ni bawk chuan khuallian niin a hmanpui a, Chief Minister Pu Lal Thanhawla chu khalzahawm a ni bawk.

Khuallian Larsap chuan zirlai hlawhtlingte chu lawmpuina a hlan a, zirtirtute chungah an inpekna avanga he hlawhtlinna hi lo awm a ni tih sawiin an chungah pawh lawmpuina a hlan bawk. Larsap chuan Icfai University hmasawn dan chu Mizoram tana chhuanawm tak anih thu a sawi a, hun reilote chhunga zirna hrang hrang hlawhtling taka an kalpui theih leh zirlaite thiam bikna nei thei tura zirtir an ni chu lawmawm a tih thu a sawiin mithiam te hi tunlai khawvelah India ram leh Mizoram chhungah ngei pawh mamawhna a sang hle a ni a ti a. Mizoram sorkar-in zirna kawnga a hmalak dan leh private institution tana ruahmanna a duan chungchanga sorkar hmalakna chu chhuanawm a tih thu a sawi bawk.

Chief Minister Pu Lal Thanhawla, Khualzahawm pawhin ram leh hnam hmasawnna atana zirna pawimawh zia thu sawiin, Icfai Universities te leh an ni ang private university ten zirna tha a awm theihna atana an hmalakna a hlutzia a tarlang a. Zirlaiten hna tha an hmuh theih nana zirna tha pek te, an zirlai tha taka an zirte bakah hna zawn kawnga Univerisity ten hma an lak thiam a pawimawh thu a sawi bawk. Chief Minister chuan Icfai University Mizoram thil tum bulpui ber - tunlai hmanraw changkang hmanga zirlaite zirtir te, khawvel huap pawha zirna tha, eizawnna tha an hmuh ngei theihna tura course pek te, khua leh tui tha an nih theihna tura zirlaite buatsaih chhoh chu a pawimawh a tih thu a sawiin hemi kawngah hian kan India ram Constitution duh anga zirtirna pawh an ti hlawhtlinga a hriat thu a sawi. Zirlai degree dawng tharte a lawmpui rualin zirna thil tum laipui hriaa nunchhuah pui fo turin a chah bawk a ni.

He hun hi Vice Chancellor Pu J.P. Ramappa in kaihruaiin University hmasawn chhoh dan chanchin a sawi a, zirlai zirzo ten hna tha an hmuh leh hmuh lohin university that leh that loh a tilang a. Mizoram zirlaite pualin study tour pawh neih thin anih thu a tarlang bawk. He convocation ah hian Icfai University Mizoram atanga kum 2012 a zirzo mi 55 te hnenah Degree hlan an nih bakah kum 2011 - 2012 a zirlai titha bikte hnenah medal hlan a ni bawk.

Mizoram Legislative Assembly in Icfai University Act hi kum 2006 khan a passed hnuah University hi din a ni a. Icfai Society - sumdawng ni lo (not for profit) in a sponsor mek niin UGC Act 1956, section 22 hnuaiah degrees pek theihna a nei a ni. Icfai University Mizoram campus area 17.58 a zau hi Durlang North ah a awm a. Campus building hi 43000 sft chhungah classrooms, computer lab, language lab, library lehkhabu 12500 chuang awmna leh zirna atana tul leh tangkai auditorium, recreation area nuam leh zau tak a awm a ni. Icfai University Mizoram hian eiawnna atana tangkai tur course hrang hrang MBA, BBA, BCA, BHTM te a kalpui mek a, zir zawh veleha hna thawk thei nghal turin zirlaite hi tuaihriam an ni. Tun thleng hian he university tan hian Icfai Sociaty chuan cheng vaibelchhe 30 chuang a seng tawh a ni.