Vawiin khan Pu Lalsawta, Higher & Technical Education Minister chuan kum 2013-a ICFAI University Mizorama zirlai tharte lawmluhna hun “Freshers’ Social” a hman pui.
Pu Lalsawta chuan zirlai lut tharte chu ram leh hnam nghahfak an ni tih hre reng tura chahin, an zirna hmunin thiamna leh hriatna a pekchhuahte a hlawk thei ang bera hmang turin a fuih a. ICFAI University-a thawktute pawh an zirlaiten an hmathlir tihlawhtling tura rinna an nghahna an nih avangin,he mawhphurhna lian tak hi an hlenchhuah ngei a beisei thu a sawi bawk. Zirna mitin huapzo leh changtlung nei tura Sorkar hmalakna leh hmathlirte chu, zirlaite leh Zirna Ina thawktute inpekna leh thawhpuina nen, a hlawhtlin ngei a beisei thu a sawi a. Zirna hi kan hnam khaichhuaktu leh khawvel hriata min pholangtu tur a nih thu sawiin, “Mizoram pawhin hmasawnna kawng a zawh meka, vawiina zirlai tharte pawhin taimakna leh tumruhna hmachhuan chungin, hmalam eng tak in nei a ni,” a ti. Pu Lalsawta hian ICFAI University Mizorama thawktu mi paruk, research beia ramchhung leh pawna an hnathawh tlangzarhtute hnenah chawimawina thilpek a hlan bawk.
He huna thusawitu dang, Pu P. Rohmingthanga IAS (Rtd) , Pro Vice-Chancellor chuan zirlai tharte chu zirna hmanrua changtlung leh campus hmun thengthaw nuam tak karah hun hlimawm nei turin duhsakna a hlan a, thiamna tak tak an zirchhuah ngei a beisei thu sawiin, ICFAI University Mizoram hmalakna hrang hranga Sorkar tanpuina leh thawhpuinaah lawmthu a sawi bawk.
He hun hi Pu Samuel L. Dingliana, Registrar chuan a kaihruai a, zirlaite atangin item hmuhnawm leh benglut tak tak ngaihthlak niin, Pu Mrinmoy Bhattacharjee, Centre Head-in lawmthu sawiin hun a khar a ni. Education Minister hi Dr. L.N.Tluangi, Director, Higher & Technical Education leh Mizoram Hindi Training College Vice-Principal ten an tawiawm bawk.
Institute of Chartered Financial Analysts of India (ICFAI) hi kum 1984-ah Hyderabad, Andhra Pradesh-ah din hmasak ber niin, Mizoramah hian kum 2006-ah zirlai 55 neiin din a ni a, a tirah BBA chauh zirna hawn niin, tunah chuan course pali- BBA, BHTM, BCA leh MBA-te zir theih a nih tawh bakah, library changtlung tak, lehkhabu 12,500 chuang awmna an nei bawk. Kumin hi zirlai thar an ngah ber tum niin 193 an nei thar a, he University-ah hian zirlai 450 chuang leh thawktu (faculty) 19 an awm mek a ni.
