Mizoram MLA General Election neih tur atana inbuatsaih nan vawiin khan Aizawl District puma Assembly Constituency 14-a Polling Station 323 theuhva Booth Level Officer te chu Vanapa Hall, Aizawlah koh khawm an ni a, inthlanpui huna an hna leh mawhphurhna hrang hrang te zirtirna pek an ni.

Booth Level Officer te hi inthlanpui awm hunah an Booth theuh atan Station Officer-ah ruat an ni dawn a, Station Officer an nih angin vote thlak ni-a vote tla zat leh tul dang report tur awm apiang thuneitute hnena report pe zel tur an ni a. Tin, Election Commission of India-in ruahmanna a siam angin, vote thlak tur ten an vote thlakna tur booth leh an serial number te an hriat theih nan inthlan hma kar khat la awmah Voter zawng zawng hnenah photo voter’s slip sem vek tur a ni a, he hna hi Booth Level Officer te hian an thawk dawn bawk a ni. Heng bakah hian Sector Magistrate te leh Polling Station-a duty tur Presiding leh Polling Officer te a tul anga lo tawiawm tura hriattir an ni bawk.

He BLO Training hi Pi H.Lalchhandami, Election Officer-in a ho a, Pi Zarzokimi, Deputy Director, LR&S, Pi Pinky Zosangpuii, A.C. leh Pu Lalrohlua, Under Secretary, DP&AR ten training an pe a ni.

Vawiin tlai vek khan Aizawl District puma hman tur Electronic Voting Machine (EVM) buaipuitu tur mi 31 te chuan DC Committee Room ah Pi Pinky Zosangpuii, Asst. Commissioner hovin training an hmang bawk a, vawiina training hmangtu te hian Aizawl District chhunga hman tur EVM set fel turin Returning Officer te an pui ang a, R.O. kaihhruaina hnuaiah hna an thawk dawn a ni.