Vawiin khan Assembly Speaker leh bialtu MLA ni bawk Pu R. Romawia chuan Bawngkawn MUP Recreation Centre Building hawnna inkhawmah Khuallian niin, building thar hi a hawng a. He hunah hian Pi Hmingthanzami, AMC Executive Councillor chu Khualzahawm a ni bawk.

Pu R. Romawia chuan Bawngkawn Unit MUP-ten building tha tak an nei ta chu lawmawm a tih thu sawiin, tangkai taka hman a nih theih a beisei thu a sawi a. MUP member te chu khawtlang tan an pawimawhzia sawi langin, thalaite nun kaihruaitu tha tak an nih mai bakah khawtlang hmasawnna kawngah pawn an tangkai takzet a ni a ti. Khuallian chuan ram leh hnam hmasawnna hi chak taka kal tur chuan mipui tanrual a ngaih mai bakah, kan intanpui tawn a ngaih thu sawiin, sorkar lakah pawh phut let rilru chauh pu lova, mipuite hi sorkar thawhpuitu kan nih zawk a tul a ni a ti.

Khuallian hian building thar lawmpuinan Bawngkawn MUP-te chu no (cups) 48 leh dekchi lian a hlan bawk a ni.

Pi Hmingthanzami chuan thu sawi bawkin, MUP Unit hrang hrangten building hmunhma neih loh leh sakna tur lama harsatna an tawh laiin Bawngkawn MUP ten Recreation Centre tha tak an din thei chu a ropui takzet a ni tiin, Bawngkawn MUP member te taihmakna chu a fak a. Building sak puitlin a nih theih nan an bialtu MLA hmalakna pawh lawmawm a tih thu a sawi bawk.

MUP Building hi metre 190.15 biala lian niin, August ni 30, 2013 khan sak zawh a ni.

Hawnna inkhawm hi Pu Thawngliana, Bawngkawn Unit President-in a kaihruai a. Pu Lalduhkima, Bawngkawn Local Council Chairman leh Pu C. Vanlawma, Aizawl North Area MUP President ten thu an sawi bawk a. Pu Chaldaia, Unit Vice President chuan Building Report pe in, Pu P.C. Lalmawia, Unit Financial Secretary chuan lawmthusawiin inkhawmna hun hi a khar a ni.