Mipui thawhkhawm cheng 15,62,160/- senga sak, Ratu PHC chu vawiin khan Pu R.L. Pianmawia, MLA chuan a hawng.
Pu R.L. Pianmawia chuan Ratu a PHC hawn a ni chu lawmawm a tih thu sawiin, “VC te thahnemngaihna leh khaw mipuite thil phalna leh inpekna vang liau liaua lo hlawhtling ta a ni” a ti. He PHC din a nih theih nan a Health Minister leh Health Department a thawk zawng zawngte hmalakna chu fakin, he PHC hi chhawr tangkaia, hma a sawn zel theih nan khaw mipuite chu inpe chhunzawm turin a chah.
PHC hawnna inkhawm hi Pu R. Lalnghakliana, BDO chuan kaihhruaiin, Jt. Director, H&FW leh Dr. Gordon Zohmingthanga, Mission Director, NRHM ten thu an sawi bawk. Dr. Lalthantluanga, CMO, Aizawl (E) chuan lawmthusawiin a khar a ni.
He PHC hi khaw mipui sum thawhkhawm leh tha a sak a ni a. Khum 10 hun a ni a, Doctor pakhatin thutchilhin, Doctor Quarter pakhat a awm bawk. Vawiin atang khan OPD hawn nghal a ni.
