Nimin khan North Eastern Council (NEC) office-ah NEC Secretary hovin Skill Development chungchangah meeting pawimawh tak neih a ni. He meeting-ah hian Sawkar Laipui hnuaia Ministry of Labour and Employment-a Joint Secretary leh Director General; Ministry of Rural Development leh Ministry of DoNER aiawhte; National Skill Development Corporation-a thuneitute; State hrang hrang Secretary engemaw zat leh Hmarchhak biala Skill Development kalpui mek mimal leh pawl thenkhat te an tel a ni.

Hmarchhak bial chu ziak leh chhiar thiamna lamah sang hle mahse eizawnna kawng hrang hrangah a pachhia hle a, unemployment rate a sang a, thalaite tan an thiamna mil a hnathawh tur a vang a, chumi atan chuan Skill Development hmanga hemi lam a thalaite tan hmalak dan ngaituaha inrawnkhawmna atan a meeting hi koh anih thu NEC chuan an sawi.

Meeting-ah hian Ministry of Labour and Employment-in Guidelines on Skill Development Intensive Schemes (SDIS) a rawn duan thar chu uluk taka sawiho niin hemi kaltlanga skill development leh vocational training atana sum ruahman dan leh Central sawrkarin sum a thawh dan te inhrilhhriat a ni bawk. Heng ruahmanna te hi state sawrkarten an kalpui tur a nih vangin Director General, Ministry of Labour & Employment chuan state sawkar te chu ruahmanna leh programme te duanga heng puanzarna atan Job Mela te buatsaih turin a chah. DG chuan ITI thar sak nan leh a awmsa te thuamthat nan tunhma aiin sum ruahman a tam a, mahse hemi lamah hian Hmarchak state hrang hrang te chuan duh aiin ke an pen chak lo a ni, a ti bawk.

Meeting-ah hian National Rural Livelihoods Mission leh National Urban Livelihood Mission hnuaiah Skill Development atana sum dah a nih chu tihpun anih thu state aiawhte chu hriattir an ni. Jammu & Kashmir Sawrkarin UDAAN Scheme hlawhtling taka a kalpui mek chu zirchian a, a that chuan Hmarchhak biala kalpui dan dap nise tih meeting-ah hian rel a ni bawk.