733/2025-2026
Aizawl Dated 5th June 2025: Vawiin chawhma khan Indian Council of Forestry Research & Education (ICFRE)- Bamboo & Rattan Centre, Bethlehem Vengthlangah ‘Ending Plastic Pollution’ tih thupui hmangin ‘World Environment Dat 2025’ puala hun hman a ni a. Pu C.Lalsawivunga, Minister, Horticulture Department chuan khuallian niin a hmanpui a, Pu Sandeep Yadav, Scientist-D, ICFRE chuan kalkhawmte lawmna thu sawiin Bethlehem Vengthlang Local Council hruaitute, Riparians aiawhte, Eco-Club, Pachhunga University College leh Govt. Middle School-ii, Bethlehem Vengthlang zirlaite he hunah hian an tel a. Kawng dung then fai hnatlang an nei nghal a ni.
Horticulture Minister Pu C.Lalsawivunga chuan kan nitin khawsakna a vawi khat hman Plastic hmanna tam ta lutuk titlem tur chuan keimahni theuh atanga bul kan tan a tul thu sawiin kan ram leilung tichhetu, kan hriselna khawih pawi thei vawi khat hman plastic hmang tlem deuh deuh tura inzirtirna atan ‘World Environment Day’ thupuia ‘Ending Plastic Pollution’ hman a ni chu lawmawm a tih thu a sawi.
Pu C.Lalsawivunga chuan kan ram leilung hausakna tichhetu Plastic chu a tawih ral ve mai loh avangin a tihralna leh sawngbawlna mumal a awm loh chuan kan tui tlan tibawlhhlawhtu, leimin thlentu, mihring leh nungchate tan a hnawksak a nih thu a sawi a. Vawi leh khatah kan tirem nghal thei lo a nih pawhin zawi zawia Plastic hmanna titlem turin kan nitin khawsak dan kan inherrem thiam a tul thu a sawi a. Bawlhhlawh chungchang bikah hian ‘Reduce, Re-Use, Re-Cycle’ hi nunpui tum a pawimawh thu sawiin bawlhhlawh siam tlem zawnga khawsak thiam te, tawih thei leh tawih thei lo thlir hran ngaih pawimawh bakah vawi khat hman plastic titlem tura midang zirtirtu leh entawntlak a nung turin kalkhawmte a chah.
ICFRE-Bamboo & Rattan Centre-a World Environment Day puala hun hmanna ah hian Dr. Nitin Kulkarni, Director, ICFRE-RFRI, Jorhat chuan Video Conference kaltlangin thupui sawi zauna hun hmangin vawi khat hman plastic titlem tura penchhuah a tul tawh takzet thu a sawi a. Dr. Kulendra Chandra Das, Assistant Professor & Head, Environmental Science Department, PUC leh khawtlang hruaitute atangin fuihna thu ngaihthlak a ni a. Pu Arun Sukumaran, Scientist-B, ICFRE chuan lawmthu sawina hun a hmang bawk a ni.
Indian Council of Forestry Research & Education hnuaiah hian Research Centre 5 leh Institute 9-a awm a, ICFRE, Bamboo & Rattan Centre hi Rain forest Research Centre hnuaia awm niin November 29, 2004 khan hawn a ni. ICFRE-Bamboo & Rattan Centre, Bethlehem Vengthlang hi 11.63 Hectare a zau niin Mau species 28 leh Rattan species 11 a awm a, Kilometre 1 a thui Bamboo trail a awm bawk a ni. Thawktu mi 15 awm mekin he Centre-ah hian Research Project 16 hlawhtling taka kalpui a lo ni tawh a, tunah hian Research 3 kalpui mek a ni
