4698/2025-2026

AIZAWL, MARCH 5, 2026: ICFRE-Bamboo and Rattan Centre (BRC), Aizawl, ah Ni hnih-awh tur training, Green Skills Training-Introduction to Composting and Apiculture tih chu vawiin khan tan a ni. He training ah hian Bethlehem Vengthlang Local Council huamchhung a mi thlan chhuah bik mi 20 te tel in, ei bang ningnawi leh bawlhhlawh tawih thei a tang a leitha siam dan leh khuai khawi dan inzirtirna hun hman a ni. Pu Sandeep Yadav, Scientist-D & Head, ICFRE-BRC chuan kalkhawmte lawm na thu sawiin, Pu JH Lalbiakliana, CEO, Mizoram Khadi and Village Industries Board (MKVIB), Govt of Mizoram chu khuallian niin, Pi PC Vanlalpeki, Treasurer, Local Council Bethlehem Vengthlang chu khual zahawm a ni bawk. He hun hi Dr. Nitin Kulkarni, Director, ICFRE-RFRI,Jorhat chuan Online hmangin a telpui bawk.

Khuallian chuan thusawiin, Sorkar hmalakna (Hand holding Policy) kal mek ah khuai khawi chu tel in, eizawnna tha zawk leh rintlak zawk siam turin Sorkar chuan hma a la mek tih sawiin, hralh chhuah dan tur ah pawh mumal zawk a kalpui dan tur ruahmanna siam mek a nih thu a sawi. Pi PC Vanlalpeki pawhin thusawina hun hmang in, kalkhawm te chu eizawnna tlak thiamna paw chhuak tur leh training te chhawr tangkai thiam tur a fuih in, duhsakna a hlan bawk. Director, Pu Nitin Kulkarni pawhin thusawina hun hmang in, mumal zawk a bawlhhlawh sawngbawl a pawimawh thu leh Agriculture a hmasawnna a thlen hrang hrang te sawiin, kan ram leilung chereu zel tur venna kawngah bawlhhlawh sawngbawl dan dik in kawngro tam tak a sut thu a sawi bawk.

Pu Subhaprada Behera, Scientist-B, ICFRE-BRC, chuan lawmthu sawiin, he hun hi a khar a. Training ah hian mithiam thlan chhuah ten practical leh theory in zirtirna hun an hmang ang.