4699/2025-2026

5th March, 2026 : Vawiin khan Fisheries Department Secretary Er.Lalrothanga hovin Fisheries Department, Sihhmui Branch YMA leh Mizoram Angling Association hoten kum 2026 a a hmasa ber atan Angling Event-Nghakuai Chiah Runpui neih dan tur an rel a. Sihhmui Nghakuai Chiah Runpui hi March ni 20-21, 2026 chhungin Tlawng Sihhmui kaiah neih tura ruahman a ni.

Fisheries Department hian a hmain kumtina mumal taka Angling Events/Fish Festival calendar neih hi a lo rel tawh a, lian tham deuhin kumin 2026 atan hian March-April ah Tlawng Sihhmui leh Tut-Dapchhuah ahte hman nise, kumtawp lam September-October chhungin Tuichang-Keitum leh Tuipui South lamah te neih turin a duang chhin tawh a ni. Hemi dungzui hian tuna Tlawng-Sihhmui Nghakuai Chiah Runpui pawh hi tih tura rel a ni.

Registration fee hi ni khat atan Rs.500/- a ni ang a, online registration a tih theih bakah a hmunah pawh in register chawp theih a ni ang. Lawmman hi category hrang hrang hetiang hian siam a ni bawk ang:

1. Sangha man lian ber
2. Sangha man tam ber
3. Hmeichhia sangha man lian ber
4. Sangha mantu upa ber
5. Sangha mantu naupang ber

A ni khatna March ni 20 ah hian zing dar 6 atanga tlai dar 4:30pm thleng nghakuai hi chiah a ni ang a. A ni hnihna March ni 21 ah hian zing dar 6 atanga chawhnu dar 2 thleng chiah a ni leh ang a, dar 2pm ah hian Closing Function neih a ni ang. Nghakuai chiah chhung hian balu lak pawh khap a ni dawn lova, mahse fimkhur deuha lak nise tih a ni. A hmunah hian sangha man ve lo tan lei tur lo zuar se tih a ni bawk.

Heng events te hi sangha humhalh chungchanga mipui inzirtirna inpekna hmanrua atan hman thin nise tih a ni a. YMA lamten sangha an humhalhna avanga an thawh hahna te tarlan bakah lui a sangha te leh nungchate  hi Fisheries Department a phalna la lova man theih a ni lo tih pawh uar lehzuala inzirtir nise tih a ni.