ICT Department ten project pathum an buaipui mek – e-District State Rollout Project, Content Management System leh Inventory Management System te chu Skoch Award 2016 atan ‘Top 100 Projects in India’ ah thlan a ni a. Skoch Award 2016 hi Hyderabad-ah ni 8th - 9th September 2016 hian neih tur a ni. Hemi chungchang hi Hon’ble Minister for ICT, Pu Lal Thanzara hovin ICT officer-te nen ni 8th August 2016 khan an sawi ho a ni. Minister chuan a department chan ICT ten National Award dawng theia an awm chu lawmawm a ti a, mipuiten awlsam zawka sawrkar an dawr theihna leh sawrkarin tangkai taka a hman project hrang hranga hlawhtlinna hmuh tur a awm zel chu lawmawm a tih thu a sawi.

e-District project-ah hian mipuite hman tangkai theih service 34 a awm a, heng service hrang hrangte hi e-District Facilitation Centre (DC office), Common Service Centre (CSC) leh Rural Information Kiosk (RIK) atangin pekchhuah mek a ni. Mizoramah hian kum 2012 atanga tun thleng hian e-transaction nuai 13.67 lai a awm tawh a. Content Management System (CMS) hi ICT engineer-te siam a ni a, sawrkar department hrang hrang-ten awlsam taka anmahni department website siam theihna tura duan a ni. He CMS hmang hian department website 141 lai siam a ni tawh. Inventory Management System hi MSeGS (Mizoram State e-Governance Society) engineer-te siam a ni a, sawrkar office bungrua chi hrang hrang stationeries, electrical goods, furniture, etc. felfai taka enkawlna tura siam a ni. Tunah hian Secretariat Administration Department (SAD) ten hlawhtling takin an kalpui mek a, department dangte pawhin hman tumin hma an la mek zel a ni.

Skoch Award hi National Award zinga central sawrkarin a ngaihhlut berte zinga mi a ni a. Ni 4 August, 2016 khan ICT Department officer-te leh Mizoram State e-Governance Society (MSeGS) officer ten New Delhi-ah presentation pein hun hmasa lamah document pawimawhte pawh an lo thehlut tawh a ni.