Vawiin khan NIELIT, Aizawl Centre, Zuangtui-ah ‘Awareness Programme on Skill Development in IT & Electronics’ neih a ni a, Information and Communication Technology Minister Pu Robert Romawia Royte chu khuallian a ni a; Pu Lalhmunsanga Hnamte, Director, Department of Labour Employment, Skill Development and Entrepreneurship (LEDSE) chu khualzahawm a ni.

Information and Communication Technology Minister Pu Robert Romawia Royte chuan thu sawiin NIELIT-in mi zawng zawng huap zo eizawnna tlak  thiam thil chi hrang hrang inzirtirna kawnga hma nasa tak a la chu lawmawm, a ti a. Information Technology chu ram changkang zawkte nena kanin el theihna a ni a, thildangah chuan an in leh lo te, bank account te pawh a inthlau viau thei a, IT sector-ah hi chuan ram changkanga an hman ang leh an tih theih tam tak hi kan ti ve thei a, chumi remchanga la chuan ram dangte el phakin kan awm thei a ni, tiin a sawi a. Hardware leh Software mai bakah, Soft Skills leh training neih a pawimawh bawk a, a ti a; NIELIT a thawktu leh zirtirtute helam kawnga hmala tur pawhin a ngen bawk a ni. Khawvel a changkang zela, mamawh leh pawimawh tih zawngte pawh a inanglo zel a, tunlai mil zela thiamna leh eizawnna te pawh her rem thiam a pawimawh a, thiam bik neite (skilled persons) chuan hnathawh senloh an nei zel a, hlawhtlinna pawh thiamna hmanga tih pungzel a awl zawk thin a ni, a ti bawk a ni. IT Development-ah hmasawnna kawng zawh dawn chuan kan dinhmun hriatchian a ngai a, ICT, NIELIT, LEDSE te pawh tangho vek tur kan ni, a ti a. Lehkha thiamlo, hna hmulo hi ngaihsak an ngai a, tute nge thiamna pek ngai, tute nge focus tur, tute nge chawikan ngai tih hi ngun taka ngaihtuah fo a tul a ni, a ti a. Hlawhtlinna hi zir sanah a in nghat veklo a, hlawhtlinna hi mi zawng zawng tan a ni thei vek a ni, a ti bawk a ni.

Khuallian Pu Robert Romawia Royte chuan mitdel 11 te hnenah CCC Certificate hlanna a nei a, khual zahawm Pu Lalhmunsanga Hnamte leh Pu C.Zoremsanga, Scientist ‘C’, NIELIT, Aizawl ten ‘Skill Development in IT & Electronics’ chungchanga inzirtirna thu tawi an sawi a. Pu Vanlalbuatsaiha, Advisor, Mizoram Blind Society chuan mitdelte’n Josh Software hmanga computer an hmandan a entir a. Pu Vanlalhmangaiha Khiangte, Scientist ‘C’ chuan lokal zawng zawngte hnenah lawmthu sawiin, hun kharna a nei a ni.

Awareness Programme-ah hian College hrang hranga zirlai, zirtirtu leh midangte an tel a ni.

NIELIT, Aizawl Centre-ah hian MCA, BCA, DCSE, DETE, ‘A’ Level, ‘O’ level bakah Short term Course te kalpui a ni a. NIELIT, Aizawl Centre in course hrang hrang a kalpui te hi National Skill Qualification Framework huang chhunga course (aligned) te an ni a, heng course te hi Ministry of Skill Development and Entrepreneurship hnuaia National Qualification Register in a pawm te an ni.