Lai Autonomous District Council (LADC) hnuaia 5-Lungtian MDC Constituency leh Chakma Autonomous District Council (CADC) hnuaia 9-Ugudasury South MDC Constituency-a June ni 6, 2019-a by-election neih tura hman tur Electronic Voting Machine (EVM)-te chu vawiin khan he'ng bial pahniha Returning Officer Dr Andrew H. Vanlaldika MCS hovin a office chamber-ah lehkha pawtin a hmanna tur polling station siam fel a ni.

He'ng bial pahniha by-election neih turah hian EVM (control unit leh ballot unit) hman tur niin, VVPAT erawh hman a ni dawn lo va. He inthlan atana hman theih tura lak chhuah EVM (CU + BU) 20 atangin 4 chu training atan hman a ni a. A la bang 16 atanga Lungtian biala hman tur EVM 10 leh Ugudasury South biala hman tur EVM 6 first randomisation-a thliar fel sa chu vawiin hian control unit leh ballot unit inkawp tur leh a hmanna tur polling station thliar fel leh a ni.

Lungtian bialah hian polling station pali - Lungtian-I, Lungtian-II, Vartek leh Vartekkai te awmin, EVM hman tur CU leh BU pali ve ve bakah, reserve EVM paruk dah a ni a; Ugudasury South bialah hian polling station pahnih - Ugudasury South leh Jarulsury te awmin, EVM hman tur CU leh BU pahnih ve ve bakah, reserve EVM pali dah a ni. Reserve EVM-te hi EVM chiangkuang lo, thlak ngai a awm palh thulha thlak nghal zung zung theih nan sector officer leh polling official-te'n an kawl dawn a ni.

Vawiin vek khan EVM hman turte hi Lawngtlai RD Block BNRGSK Hall-ah hman mai theih tura buatsaih fel nghal a ni a. Candidate-te hming bel niin, EVM engineer-in a khawl that leh that loh a enfiah vek bawk a. EVM-te hi buaipui tul ang angte buaipui a, hman theih tura peih fel vek a nih hnuah thalhrita char leh chhinchhiah vek a ni bawk.