ICT Minister Pu Lal Thanzara leh Information & Communications Technology (ICT) Department hotute chuan vawiin khan a pisaah an department hmalakna an thlirho.
Meeting-ah hian ICT Secretary Pu C Lalhmachhuana hovin Chief Informatics Officer Pu Lalthlamuana leh officer dangte an tel a. CIO hian an Department hna chanpualte sawi fiahin an hmalak tawhna, hmalak mek leh hmachhawpte a tarlang a ni.
ICT hi kum 2008 khan Mizoramah ding tanin tunlai khawvel hmasawnna in a ken tel, a lova awm theih tawh loh Information Technology hmanga sorkarin chak zawka hna a thawh theihna tur kawng an dap a. Hmachhawp an neih an tihpuitlin tawh zingah Mizoram Revenue Deparment nena tangkawpin Land Record Computerization hlawhtling takin an kalpui tawh a, Property Registration-te pawh zawhfel niin Common Service Centre (CSC) pawh din a ni tawh a, Aizawl District bikah E-District Pilot Project hlawhtling taka kalpui a ni bawk. Ramchhung State hrang hrangte zingah Mizoram chu E-District Pilot Project kalpui chak ber a ni a, he Service hmang hian hmunpui pan kher ngai lovin khaw dang atang pawhin Income Certificate, Residential Certificate, Inner Line Permit, Tax Exemption Certificate, Housing Loan Clearance Certificate thlenga lakchhuah theih a ni tawh a ni.
ICT Department hian Chief Minister’s Office (CMO) leh Secretariat building te pawh Computer Networking hmangin a thlunzawm vek tawh a. Mizoram State Wide Area Network (SWAN) hmangin District, Sub-Division leh Block Office te pawh thlun zawm a ni tawh. Sorkar laipui ngaih pawimawh em em, National e-Governance Plan (NeGP) pawh he Department hian chak takin a kalpui a.H e project in a tum ber chu mipui mimir te’n office leh hmunpui harsa taka pan kher ngai lova an kawtkai atanga sorkar an dawr theihna tura awlsamna siam sak a ni. State Wide Area Network (SWAN), State Data Center leh Common Service Center-te hi he NeGP hnuaia kalpui a ni.
Kumin March thla tawp lamah E-District hi District dang pasarihah hman tan tum a ni a. State Data Center buatsaih mek chu March ah hawn hman tum a ni bawk. Hei hi hawn a nih hunah chuan Department hrang hrangin IT hmanga hmalakna hrang hrang an kalpui mek tihhlawhtlin nana hardware an mamawhte hmun dang atanga lei kher ngai lovin he State Data Center atang hian a lak theih tawh dawn a ni. Software Technology Park of India pawh hman theih tura peihfel diam tawh niin hawn mai hma bakin a awm mek bawk.
