February ni 3 atanga neih tan, hmarchhak bial huap National Services Scheme(NSS) Youth Festival chu vawiin khan khar a ni ta a. Mizoram University Multipurpose Hall, Tanhrilah kharna inkhawm neih niin Pu R.Romawia, Higher & Technical Education Minister-in a hmanpui a ni.
Khuallian Pu R.Romawia chuan hmarchhak bial thalaite chu India ram leh a bikin hmarchhak biala hnam hrang hrangte inpumkhatna siamtu atana thawktu pawimawh an ni, a ti a. Khawtlang thatna tur leh midangte tanpui nana NSS volunteer te inpekna chu chhuanawm a tih thu tarlangin Pu Romawia chuan NSS ten intawh khawmna hun an hman thin chuan hmarchhak biala hnam hrang hrangte inkarah inpawh tawnna leh inhriat thiamna a tih ngheh deuh deuh a beisei thu a sawi a. Thawhhona tha tak leh inlungrualna nen hmarchhak bial thalaite chuan helai bial tan leh India ram pum tan thil ropui tak an thlen thei a ni, a ti bawk. Tun tum NSS Youth Festival-ah hian Arunachal Pradesh tih loh hmarchhak state dang zawng atangin volunteer mi 200 vel an kalkhawm a. Festival neih chhung hian thalai rualte chu subject pawimawh tak tak, voluntary blood donation, disaster managment leh human trafficking chungchangah te inzirtirna neihpui an ni a.
Tun tum hi Mizoramin hmarchhak bial huap NSS Youth Festival a thlen vawi hnihna niin volunteer rualte chu Mizo village, Falkawn leh Hmuifang tlangte fanpui an ni a. Festival neih chhung hian talent intihsiakna hrang hrang te neih a ni bawk.
Vawiina Festival kharna inkhawm hi Dr. Lalzuiliana, State Liaison Officer & Deputy Secretary, NSS(Cell), Mizoram-in a kaihruai a. Hmarchhak state hrang hrang atanga volunteer ten hnam lam leh zaite entirin Dr. Zoramdinthara, Programme Officer, NSS, Pachhunga University College in lawmthu sawiin hun hnung a khar a ni.
