Nimina Govt. Middle School-I, Lungsen Golden Jubilee lawmnaah UD&PA Minister Pu Zodintluanga chu Khuallian chan changin Jubilee Lungphun a hawng nghal a ni. He hunah hian DEO Lunglei Pu Lalthakima leh SDEO Lungsen Pu K.Hrahia ten Minister hi an tawiawm a ni.

Jubilee Lawmna inkhawmah Khuallian Pu Zodintluanga chuan thu sawiin zirna hi mihringte puitlinga min siamtu leh hlawhtlinna kailawn a nih avangin mitinin kan ngaihpawimawh a tul tak zet a ni, a ti. Retheina leh harsatna atanga min khaichhuak theitu chu lehkhathiamna a ni tiin Minister chuan zirlai leh zirtirtu kalkhawmte chu theihtawp chhuah a, taima taka zirna lam um zel turin a chah a ni. Lungsen bial chu zirna lama hnufual anga ngaih a nih avangin sorkar pawhin an hmasawnna tur kawng hrang hrang a ngaihtuah a, RMSA kaltlangin zirlai hmeichhiate tan Girls’ Hostel a sak mek thu a tarlang. Lungsen Middle School-I in ram leh hnam, khawtlang leh kohhran tana mi tangkai leh hlawhtling engemawzat an chher chhuak tawh chu entawntlak hlea a hriat thu sawiin an kal zelna turah Minister chuan duhsakna a hlan a ni.

Lunglei DEO Pu Lalthakima pawhin thu sawiin Sorkar Laipui chuan rampumah hmasawnna rualkhai zawka kalpui a nih theih nan zirna pawimawhzia hriain, ruahmanna hrang hrang a siam zinga pakhat RMSA hnuaiah Lunglei District chhunga High School 34 tuam tir a ni a, zirna lamah pawh District-ah hmasawnna hmuh tur a awm mek zel a ni, a ti.

Nimin vek khan Sports & Youth Services Minister ni bawk Pu Zodintluanga chuan Lungsen-a Mizoram State Sports Council kaltlanga playground siam mek chu a hmunah a tlawh nghal a ni.