1214/2026-2027

Dated Aizawl, the 29th June 2026: Vawiin chawhma khan Information & Communication Technology (ICT) Department Minister Dr Vanlalthlana chuan Directorate of Economics & Statistics Conference Hall-ah 20th National Statistics Day chu khuallian niin a hmanpui a. Kumin National Statistics Day thupui (theme) chu “Unlocking the potential of Administrative Data” tih a ni.

Dr Vanlalthlana chuan khawvel thang zel leh changkang zelah Data leh Statistics pawimawhna a lang chiang telh telh a ni a ti a. Sawrkar tha taka a kal theihnan data dik sawrkarin a mamawh a, thuthlukna fel leh dik siamnana pawimawh ber pakhat a nih thu a sawi bawk. Minister chuan data dik neih mai bakah data phena thil thlen chhan chhui a pawimawh tel thu a sawi bawk a ni.

Minister hian ICT leh Directorate of Economics & Statistics thawk duna an siam, Mizoram Civil Registration System (CRS) Portal a tlangzarh nghal a. CRS hi Mizoram puma Piang leh Thi chhinchhiahna tura siam a ni a, Central Sorkar CRS Portal nena inchawmtawn thei tura duan niin, MeitY Empanelled CSP hnuaiah Cloud leiin he Portal hi siam a ni.

Lawmna inkhawm hi Pu David Lalthantluanga IAS, Secretary to the Govt. of Mizoram, Planning & Programme Implementation Department-in a kaihruai a. Pu Lalrinfela, Informatics Officer, ICT hnen atangin CRS Mizoram Portal siam thar a nih dan Technical report ngaihthlak a ni bawk. Pu B. Lalrinhlua, Director, Economics & Statistics Department chuan lawmthu sawiin chawhma hun a khar a ni.

Chawhnu hunah hian kumin Statistics Day Thupui ‘Unlocking the Potential of Administrative Data’ tih chu zirho a ni. He Zirhona hi Pi Mary Lalrinchhungi, Jt. Director, Economics & Statistics chuan Moderator niin a kaihruai a. Pi Lalhmangaihsangi, Asst. Director, Economics & Statistics-in PowerPoint Presentation a buatsaih chu a present a. Kal khawmte’n sawihona leh zawhna leh chhanna hun an hmang nghal bawk. Pi B. Vanlalrengi, Dy. Director, Economics & Statistics-in lawmthu sawiin chawhnu hun hi a khar a ni.