1215/2026-2027 

Dated Khawzawl, the 29^th June, 2026 : Vawiin khan Bawrhsap Pu K. Vanlalthiana, NCORD Chairman ni bawk kaihhruaiin DC Conference Hall-ah June thla atan Khawzawl District Narco Co-Ordination Centre (NCORD) meeting neih a ni a. NCORD meeting hmasaa thurel bawhzuinate thlir let niin, hma lak zel dan tur sawiho a ni.

SP Pu F. Lalbiakzauva, NCORD Member Convener ni bawk chuan drugs man dan report pein, NCORD meeting hnuhnung ber atang khan Heroin 228 grams, Rs. 45,60,000 man hu leh Methamphetamine 1.972 kg, Rs. 1,57,76,000 man hu man a nih thu a tarlang a. Kumin kum chanve chhung hian Khawzawlah ruihhlo kaihhnawihah case 49 ziahluh tawh a ni. 

Khawzawl District-a Drug Free Village-a thlan Tlangmawi khua pawh endikna leh a tul dangte zawh fel tawh niin, State level NCORD-a pharh theih tura peih fel tawh a ni a. July thla hian Khawzawl Chhim Veng Presbyterian Kohhranah awareness campaign neih tura ruahman a ni a. Anti-Tobacco Squad hmalakna ngaihthlak niin, sawrkar office leh vantlang hmunahte meizial zuk khapna chu tha taka kenkawh nise, dan bawhchhiate chu section 4 of the Act Cigarettes and Other Tobacco Products Act, 2003 (COTPA) hmangin Rs.200 chawi tir tur an ni tih tarlan a ni a. Ruihhlo leh a kaihhnawih do bakah, a bikin naupang leh thalaite zuk leh hmuam laka an fihlim theih na tura hma lak dan turte sawiho a ni. 

Bawrhsap Pu K. Vanlalthiana chuan kan ram hi ram nuam leh muang, khawsakna tlaka siam turin line department-te bakah khawtlang hruaitute leh mipuite tanrual a ngaih thu a sawi a. Kalkhawmte chu an theihna zawn theuhah ruihhlo do kawnga tan la zel turin a sawm. Vawiin thutkhawmah hian NCORD member-te, COD-NERC leh SYMA Anti-Drug Squad te an tel a ni.