1216/2026-2027 

Dated Khawzawl, the 29th June, 2026 : Vawiin chawhnu khan UD&PA Department leh NABARD tangkawp buatsaih Self Help Group-te (SHG) thil siamchhuah leh tharchhuah zawrhna tur 'Gram Dukan' dawr chu Khawzawl Deputy Commissioner Pu K. Vanlalthiana’n a hawng a. He hun hi District Urban Development Officer (DUDO) Pu Chandrakant Bagoria’an a kaihruai.

Khuallian Pu K.Vanlalthiana chuan Gram Dukan hawn a ni chu lawmawm a tih thu sawiin, DUDO leh NABARD-a thawktute chungah lawmthu a sawi a. SHG-ten an thil siamchhuah te chu a tha thei ang bera siam zel turin leh an phochhuah dan thlenga uluk turin a chah a. Gram Dukan chu tangkai taka hmang turin duhsakna a hlan bawk a ni.

He hunah hian Pi Lalhmachhuani, DMM, NABARD Champhai hnen atangin report ngaihthlak niin, 'Gram Dukan' SHG Dawr atan hian grant support pawisa sanction zat hi Rs. 3,73,000 a ni tih a tarlang a. Mimi Lalrinngheti, CMM, Day NLUM, UD&PA in lawmthu sawiin he hun hi a khar a ni. Vawiin Gram Dukan hawnnaah hian SHG member thahnem tak an tel a ni.