Vawiin khan Pu Zodintluanga, Information and Communication Technology Minister chuan Common Service Centre Scheme (CSC) of NeGP, Govt. of India hnuaia Village Level Entrepreneurs (VLE) te tana training buatsaih ni hnih awh tur chu  I&PR Auditorium ah a hawng. He training hi ICT Deptt. hriatpuina a Zoom Developers  Private Ltd te buatsaih a ni.
Pu Zodintluanga chuan Common Service Centre Scheme (CSC) chungchang hrilhfiahin National e-Governance plan kenkawhna tur hmanraw pakhat a nih thu te, e-Governance chu khua leh tui ten awlsam taka mahni kawtkai atanga sorkar kan dawr theih na tur a nih thu leh sorkar langtlang siam theihna tur hmanrua a nih thu te a sawi a.Heng CSC din tur leh kalpui tur hian Zoom Developers, Gurgaon chuan Open Tender chhangin thlan an ni a, he scheme hi mimal company leh sorkar thawh hona, Public Private Partnership model (PPP) hmang a kalpui tur a nih thu a sawi bawk . Company, mipui leh sorkar in thahnemngai taka tang tlanga he scheme hlawhtlinna tur a thawh a pawimawh a ni, a ti. Kalkhawmte chu hmuhtheih leh chhawrtlak a hlawhtling tak a hnathawk turin a fuih a ni.

He hun kaihruaitu Pu Joseph L Ralte, State Head, Zoom Developers chuan CSC  leh Zoom Developers chungchang a hrilhfiah a.Mizoram chhung hmun hrang hrangah CSC 136 din tum a ni a, chung zingah chuan 64 din a ni tawh a ti a. He scheme hmang hian awlsam takin mahni kawtkai maiah ticket bookingte, bill hrang hrang tui bill te, electric bill te, phone bill te thleng a pek theihna tur a ni tih sawiin Driving license te, Voter ID te leh Banking thlengin a la tih theih tur thu a sawi.Vawiin leh naktuk nilengin training hi kalpui a ni ang.