Nimin chawhnu khan Saiha District-in power supply a hmuh that tawk loh avanga harsatna a tawh mek leh a sutkian dan tur ngaihtuahin District Administration hotute, Power & Electricity Department-a thawktute, Saiha khawpui chhung VCP te, NGO hruaitute, khawpui chhung MDC te leh chanchinbumite chu Pu Kunal, IAS, Deputy Commissioner hoin DC Conference Room-ah an thukhawm.
He meeting-ah hian power renchem a ngaih thu uar taka sawi a ni a. Veng tinin rualkhai zawka power supply an dawn theih nan leh World Cup an en theuh theih nan tlai lam dar 5:00-9:00 chhung chu current heh chi hmanrua - Fridge, Fan, Heater, Street Lights, Sodium Light, High Mast, etc., te switched off thin ni se. Hemi chungchang hi VC ten anmahni area-ah theuh uar takin lo puangzar thin se; tin, current heh lo chi tubelight leh CFL bulb hmang uar tura inzirtir nise meeting chuan a ti a. Saiha district hi "bulb-free district' ni thei se an duh thu an sawi bawk. Rualkhai leh mumal deuh zawka eng pek a nih theih nan Power & Electricity Deptt. lamin tan la sela, harsatna an neih pawhin mipuite hriattir thin se; tin, dan loa electric chhi ru an awm leh awm loh dap chuakin dan bawhchhiate chu an phu tawk hremna pek ni se an ti bawk.
