No.3461/2020-2020 

Aizawl, the 25th July 2020 : Vawiin khan North Serzawl Education Committee buatsaiha Zirlai Pass tharte chawimawina hun chu ICT Minister Pu Robert Romawia Royte chuan hmanpuiin zirlaite hnenah chawimawina thilpek leh citation a hlan.

Sports Minister ni bawk Pu Robert Romawia Royte chuan thusawiin N.Serzawl khua chu Mizo mi chhuanawm tak tak lo chhuahna khua a ni a, NSEC-in zirna kawnga hma an lakdan chu fakawm a tih thu a sawi a, Zirlai naupang te chu taima taka an zirlai zir tur leh an khaw chhuak mi ropui tak takte chu entawn turin a fuih a. NSEC, MHIP leh MUP te chu sumfaia tanpuiin Branch YMA te chu Thlanlaihna hmanrua leh Silpouline pein VC te chu Portable PA System a pe bawk.

N.Serzawl khawtlangin in field thar laihna sum an dil chu Sorkarin September thla ah ngaihtuah dawn tiin a sawi.

Sports Minister Pu Robert Romawia Royte chuan N.Serzawl mipuite leh Tuivawl bial mipuite chu Bialtu Minister chak tak an neih avangin a lawmpui thusawiin, hun rei lote chhunga hmalakna rah tam tak awm chu a lawmpui thu a sawi.

Sports Minister chuan Sesawng hmuna Sports complex siamna hmun tura khawtlangin an rawtna hmun chu a tlawh bawk a. Minister chuan Bialtu MLA leh Speaker ni bawkin a ngaihpawimawh avangin Sesawng Sports Complex a hlawhtlin theih nan Sorkarin theihtawp a chhuah tur thu a hrilh a, MSSC Engineer ten uluk zawkin an endikin an teh zui nghal a ni.

Programme-ah NSEC Chairman Pu Lalhnehzova, Pu Rochungnunga, President Ex-MNA, Pu Vanlalliana, MSU Gen Hqrs President leh mi dangten thu an sawi bawk a ni.