1814/2024-2025

Aizawl dated 29th August 2024: Vawiin khan DC Conference Hall, Aizawlah HIV hrik darh zel tur venna kawng a hmalakna beihpui,’IEC Campaign on India Fight against HIV/AIDS and STIs’ kalpui dan tur relin Aizawl District AIDS Prevention and Control Committee chuan thutkhawmna an nei a. Er. Lalhriatpuia, Deputy Commissioner leh Chairman, DAPCC chuan hun kaihruaiin Dr. R. Zonunmawii, DPM, DAPCU chuan Aizawl district HIV/AIDS dinhmun tarlanna hun a hmang a ni.

Hun kaihruaitu Er. Lalhriatpuia, Deputy Commissioner chuan inzirtirna tha leh mahni inthunun theihna hmang a hneh theih natna, HIV/AIDS vei tam lam a ram pum a hmahruaitu kan ni chu veiawm a tih thu sawiin he hrik inkaichhawnna tichat tur hian ‘IEC Campaign on India Fight against HIV/AIDS and STIs’ chu hlawhtling tak a hman a pawimawh thu a sawi a. He campaign chhung hian HIV hrik inkaidarh dan leh a inven dan inzirtir bak ah a hrik vei tawh te tha tak a enkawl theih an nih dan inhrilhhriat tel a pawimawh thu a sawi a. He campaign hian Aizawl khawpui pawn  thleng a tuam theih nan ruahmanna kalpui a tul thu a sawi bawk a ni.

Thutkhawmna a tarlan danin ‘IEC Campaign on India fight against HIV/AIDS and STIs’ hi September 2024 chhung kalpui tur a ni a. HIV/AIDS la vei lo te him zel nana zirtirna tha pek leh a vei tawh ten hriselna tha an neih theih nan leh midang an kaichhawn loh nan inenkawlna tha pek hi a tum ber a ni. Campaign kalpui chhung hian zirtirna kengtel inelna; Debate, Quiz, Placard making Competition, Photo Booth making Competition, Flash mob dance competition leh Rally-te neih tum a ni.

Dr. R.Zonunmawii, DPM, DAPCU chuan Aizawl khawpui chhung ah kum 2018 atanga 2024 chhung hian chhinchhiahna hrang hrang atangin, HIV vei hmuhchhuah thar hi a tlahniam hret hret a. Kum 2018-19 khan HIV vei hmuhchhuah mi 2141 an nih laiin kum 2023-24 khan mi 1373 chhinchhiah an nih thu a sawi a. HIV hrik kai za zela 64.4-te chu mipat hmeichhiatna atanga kai an nih thu a tarlang bawk a ni.