Vawiin khan Indian Economic Service (IES) Probationer 15, Mizorama Exposure Visit neia cham mekte chuan Chief Minister Pu Lal Thanhawla chu a pisa ah an hmu.
Chief Minister chuan IES officer te chu an training schedule-a Mizoram an tlawh tel chu lawmawm a tih thu sawiin, Mizoram leh Mizote chanchin tlangpui a hrilh a. Kum 20 chhunga rambuai in Mizoram kawng hrang hrang a nghawng dan te, mipui tan harsatna a thlen a, hmasawnna kawng pawh state dangte anga zawh hma ve theilo a nih dan te sawiin, chuti chunga tunah India state ralmuang berte zing a mi a nih tak thu te Chief Minister chuan a sawi a. Ei leh barah pawh kawng hrang hranga Mizoramin hmasawnna a hmuh thu te sawi bawkin, NITI Aayog zirchianna atanga a lan dan in 2013-2016 chhung khan Gujarat, Jharkhand leh Tripura te nen India state GSDP thanna 8% aia sang awm chhun state pali zing ami a nih thu te, chaw khawpkhamlo awm tlemna ber (least malnourished) state a nih thu te, 2016-17 chhunga India ram pum GDP thanna chu 7.6% a nih laia Mizoram GSDP thanna chu 9.1% a nih thu leh, Ministry of Finance chuan tun sawrkar kum kal mek a Mizoram GSDP thanna chu double digit ni tura an hrilhlawk thu te a hrilh a. Mizoram chu India leh South East Asia ramte insumdawntawnna atan luhka pawimawh tak ni mai tur a nih thu sawiin, Kaladan Multi Modal Project atana hmalak dante a sawi a ni. Chief Minister Pu Lal Thanhawla chuan IES Officer training mekte chu an kal zelna turah duhsakna hlan in, an hnathawhnaah hleih nei lovin, ram mipui tana thawk an ni tih inhre reng a rinawm leh thahnemngai taka thawk turin a chah a ni.
IES Officer te chuan Chief Minister chungah lawmthu sawiin, Mizoram chu nuam an tih thu leh, a mi chengten khual thlen thiam an tih thu a sawi a. Tourism lamah pawh hmasawn theihna thui tak neia an hriat thu an sawi bawk.
IES 15th Batch Probationer te hi Institute of Economic Growth-a training nei lai mek niin, an vaiin mi 15 (hmeichhia 12 leh mipa 3) an ni a. Nimin khan Mizoram lo thlengin, sawrkar hotulu pawimawh thenkhat an hmuh kual bakah sawrkar department thenkhat tlawhin presentation te an ngaithla a. Ni thum chhung an cham dawn a ni.

Attachment

  • Loading attachment...