Vawiin hi National Statistics Day vawi 12-na a ni a. Lawngtlaiah chuan District Economics & Statistics Dept huaihawtin District Research Officer (DRO) Conference Hall-ah he ni pual hian hun hman a ni a. Lawngtlai Bawrhsap Pu N. Chakhai MCS chu Khuallian a ni. 

Pu N. Chakhai chuan ruahmanna (plan) siam nan reng reng statistic (thil tul leh mamawh zat lawr khawm) neih hmasak zel a tul a, ram hma sawn nana ruahmanna chhawhnahawm tak siam thei tur chuan statistic dik leh rin tlak neih a pawimawh a ni, a ti a. India sawrkarin statistics pawimawhzia hriain a pualin ni bik a serh hrang a, sawrkar thil tum a hlawhtlin nan Statistics Day hman chu statistics pawimawhzia hriatna kawnga ram mipui leh zirlaite tiharhtu leh zir duhna thinlung petu ni thei se a duh thu a sawi. 

He hun hi Lawngtlai DRO Pi H. Chhunkungi’n kaihruaiin, Day hman chhan leh kal khawmte lawmna thu a sawi a. Inspector of Statistics Pu H. Lalkhawngaiha’n Prof. PC Mahalanobis-a chanchin a sawi a. GRHSS Lecturer Pi Lalhlimpuii’n Statistics Day 2018 thupui “Quality Assurance in Official Statistics” tih hmanga a thu ziah a chhiar a. Zirlai kal khawmte tan DRO office-a LDC Pu Ricky Lalhriatpuia’n quiz a buatsaih bawk. 

He hunah hian sawrkar official te, Registrar of Birth & Death te, Govt Southern Public High School-a pawl 10 zirlaite an kal khawm a. Quiz-ah hian GSPHS zirlai atangin Lalrinchhani chu pakhatna a ni a, Raymond Lalhruaitluanga chu pahnihna niin, Laidinthari chu pathumna a ni a. Lawmmanah pawisa fai pek an ni. 

India ram tana statistics lama sul sutu thawh hlawk tak Prof. Prasanta Chandra Mahalanobis-a chawimawi nan leh hriat reng nan a pian cham June ni 29 hi India sawrkar chuan kum 2007 khan Statistics Day-ah puangin, kum tin hman a ni thin a. Kumin hi Prof. PC Mahalanobis-a pian cham kum 125-na a nih avangin India sawrkar chuan Rs 125 thir pawisa nawi (coin) chu amah hriat reng nana dah thatah tichhuakin, hman theih tur Rs 5 thir a tichhuak bawk. Prof. PC Mahalanobis hi kum 1893 June ni 29 khan a lo piang a. Scientist leh statistician niin, 1931 kuma Indian Statistical Institute (ISI) dintu a ni.