2563/2026-2027

Dated Aizawl, the 8th October 2026: Vawiin khan Finance Department (Fiscal Management Wing) buatsaihin Pilot Department pahnih - School Education Department leh Police Department-te tan IFMIS Pension Module chungchanga Master Trainer-te inzirtirna - 'Training for Master Trainers on Pension Module in IFMIS' chu MSeGS Conference Room, Aizawlah neih a ni a. Pu Laldinpuia, Deputy Secretary, Finance Department chuan training programme hi hawngin Pi Esther Lalremruati, FAO, Finance Department chuan hun a kaihruai a ni.

Pu Laldinpuia chuan Pension Module hman theih tura peihfel a ni chu lawmawm a tih thu sawiin a phena thawktu zawng zawngte fakawm a tih thu a sawi a. Tunlai khawvelah system-in nasa taka hma a sawn tawh avangin IFMIS pawh RBI leh Ministry of Finance nen thlunzawm a nih tawh thu a sawi a, chuvangin kan hman thiam a pawimawh chhoh zel tur thu a sawi a ni. Pension Module hian pension buatsaih kawngah hna a tih zangkhai an beisei thu sawiin langtlang sawrkar siamna kawng pawimawh tak a nih tur thu a sawi bawk.

Pi Esther Lalremruati chuan IFMIS hman tan a nih hnuah Pension Module hman theih tura peih fel a ni ta chu lawmawm a tih thu sawiin - "Mizoram IFMIS danglamna leh that bikna pakhat chu system hi modular taka design, micro-service architecture hmanga siam a nihna hi a ni" a ti a, nakin zel atan 'single source of truth data' Mizoramin kan nei thuai thei dawn a ni a ti bawk.

He training hi ni hnih chhung (8th-9th Oct 2026) awh tura ruahman niin Resource Person atan Pu Mikha Mochahary, Project Manager, Interlace India Pvt. Ltd leh Pu F. Lalremruata, Help Desk Engineer te hman an ni a. Pension Module atan hian Requirements Gathering leh User Acceptance Test (UAT) te zawh fel tawh niin, Live thuai tura hmalak mek a ni.