Indira Gandhi National Open University (IGNOU) Regional Centre, Aizawl chuan vawiin khan I&PR Conference Hall-ah ‘Co-ordinators’ Meet 2013’ a buatsaih a. He hun hi IGNOU Regional centre, Aizawl hnuaia SC hrang hrang Co-ordinator leh PIC te an tel kim hle a ni.

He programme hawnnna inkhawm ah hian Pu K. Lal Nghinglova, IAS, Commissioner/ Secretary, Department of Education; Government of Mizoram chu khuallian niin IGNOU hmalakna hrang hrang te leh a hnathawhte chu fakawm a tih thu a sawi a. Mizoram-a zirna in hma a sawn zel theihna tura tan la zel turin he huna lo kal khawmte chu a fuih bawk a ni.

Dr. SR Zonunthara, Regional Director, Regional Centre, Aizawl chuan inlawmna thu a sawi bakah IGNOU in scheme thar a buatsaih Mobile SC chungchang a tarlang bawk a. He Mobile SC hi hmun kilkhawr lehzuala awmten zirna an chhunzawm theihna tur a nih thu sawiin he scheme tihhlawhtling tura hmalakpui turin Co-ordinators leh PIC te chu a sawm nghal bawk a ni.