Tun thla ni 5 – 8 inkara Myanmar khawpui thenkhat a India – Myanmar Business Summit buatsaih chu hlawhtling taka neih a ni a. He Business delegation-a India palai nia kal leh delegation-a Minister awmchhun Industries Minister Pu S. Hiato chuan March ni 11 khan Aizawl a lo let leh a ni.

He Business Summit chhung hian Yangoon leh Sittwe-ah te India – Myanmar Business Seminar neih a ni a, Business to Bussiness meetings te pawh hlawhtling taka neih a ni bawk. He Business Summit chhung hian hun awl awm miah lovin Myanmar Sawrkar mi pawimawh hrang hrangte India ram atanga investor kalte nen an hmu a. Myanmar Union Minister Agriculture & Irrigation leh Deputy Union Minister Transport te nen inkawmna hun tha tak an nei thei a. Pu S. Hiato leh Myanmar Tourism Federation-a an President nen Mizoram mipui leh Myanmar mipuite in hriat chian zawkna tur programme buatsaih a tul thu te an sawi dun bawk a ni.

March ni 7 khan Rakhine State ah Business Seminar buatsaih a ni bawk a. He business seminar-ah hian Rakhine State Chief Minister leh Cabinet Minister zawng zawngte an tel vek avangin leh Mizoram atanga kal Pu S.Hiato, Minister nen inpawh takin inkawmhona an neih theih avangin India ram Investor te pawhin North East India leh South East Asia connection atan Mizoram pawimawh zia an hriat fiah phah hle ni a hriat a ni.

Rakhine Chief Minister leh Cabinet Minister te hian phur takin Kaladan Project peihfel a nih hun an nghahhlelh thu an sawi a, insumdawn tawnna nei turin an inhawng hle a ni tih an sawi a, Rakhine State leh Bangladesh border-trade hian 23.85 million US Dollars a thleng pha a, chu chu Tamu leh Rih border trade past aiin a sang hle zawk tih Rakhine Chief Minister hian a sawi bawk a ni.

March ni 8 khan ICC Team leh Industries Minister Pu S.Hiato te hian Kaladan seaport construction site an tlawh a, a hmun ngei ah urhsun taka hna kallai mek hmuh chu hlawk thlak an ti tlang hle a ni.