Nimin ni 14.3.2014 chawhma dar 11:00 khan Champhai I &PR Auditorium-ah Champhai DIET IGNOU PSC-1933P Induction Meet 2014 neih a ni a, he hun hi Champhai Addl. DC Pu Zoengsanga'n khuallian niin hmanpui.
Khuallian Pu Zoengsanga chuan thiamna famkim nei tura Human Resource Development ruahmanna kalpui mek hi tih hlawhtlin anih theih nan thawktute leh thiamna dawngtu zirlaite pawhin theih tawp chhuah tlan atul thu sawiin, zirna lama mithiam tak tak hna nghet nei mumal lova awm mek tam tak an awm mek laiin, sorkar-in min dahna dinhmun theuhah lungawi tak leh rinawm taka thawh hi mimal tin mawhphurhna a ni a ti a. Mahni hna a rinawm leh inpezo apiangte hi mi zahawm an ni tih tarlangin, sorkar school a zirtirtu tam zawk leh hlawh tam zawk hlawhtute school aiin hlawh tlem zawk a thawk Private school-ah zirlaiten thiamna tha zawk an neih theihna chhan hi chhut ngun atul hle tih sawiin, Pu Zoengsanga chuan zirlaite hmakhua ngai chunga thahnem ngai taka thawk turin a chah bawk.
He Induction Meet hi Champhai DEO Pu Lawmawma'n a kaihruai a, IGNOU Aizawl Regional Director Dr. SR Zonunthara'n Induction Speech neiin, Mizoramah IGNOU Study Centre 41 awm mekah Master Degree Programme Stream 15, Bachelor Degree Programme Stream 9, Post Graduate Diploma Programme Stream10, Post Graduate Certificate Programme Stream 2, Diploma Programme 10 leh Certificate Programme Stream21 kalpui mek anih thu a sawi.
IGNOU hi 1985 din tan niin, Khawvel ram 35 chuangah a in zarpharh tawh a, India rama Regional Centre 60 kal tlangin thiamna lamah Certificate course atanga Doctor of Philosophy Degree thleng a pe thei a, tunah hian Mizoram bikah IGNOU zirlai 10,000 chuang awm mekin, zirlaite senso a tlem thei ang ber bituk a ni a, Tribal zirlai tan zirna fee pek tawhte sorkarin a pek let leh thin avangin IGNOU hi senso awm lova zirna sang zawk zirna ti a vuah hial a ni.
Champhai DIET Programme In-charge IGNOU PSC, Pi Hnamte Rebecca Lalbikdiki'n zirlaite hriattur tul pawimawh zual tarlanna a neih bakah Champhai SDEO Pi K. Lalsiamliani'n zirlaite fuihna thu sawiin, Champhai DIET Principal Pu R.L. Thianghlima'n lawmthu a sawi bawk.
