Tukin zing dar 7 khan District Consumer Forum huaihawtin Lawngtlai Chawngte Peng Bazarah World Consumer Right Day hman a ni a, Dr HTC Lalrinchhana, MJS; Chief Judicial Magistrate-cum-Senior Civil Judge, Lawngtlai &Saiha District chu Khuallian niin zing kara chawhmeh leh thildang leia Bazar mipui kalkhawmte hnenah thil leitute dikna chanvo hrilhhriat an ni.

Khuallian chuan sawrkar dan hnuaia thil leitute chanvo nihphung leh a lo irhchhuah dan te sawiin thil leitu lungawilohna neite tana dan anga hmalakna awm thei hrang hrangte a a sawifiah a. Thil lei leh hralh thua a leitute/ a tuartute an lungawi miau chuan a bawhchhetu emaw a ti diklotute chungah hremna a lek theihloh tluk a ni a, amaherawh chu fel taka thuneitute hnena thlen a nih erawh chuan chak taka hmalak thin a nih thu a sawi a, thil fellote dan anga chinfel ngei a nihloh chuan kan tan khua a var tikni a awm thei lovang a ti bawk.

Thusawitu dang, Central YLA leh Lai Women Association aiawhte pawhin Lawngtlai chu bukna leh tehna dik hman thuah an la hnufual viaua an hriat thusawiin dawrkaite leh thil hralha eizawng apiang ten an chipuite tana an rawngbawlna hlutzia hre thar lehin dik zawka engkim hralh turin hma la theuh se an duh thu an sawi.

Tukin zinga Consumer Right Day inkhawm hi District Consumer Forum Chairman Pu B. Lalhuma, Ex MDC, LADC in a kaihruaia, Chairman hian Lawngtlai mipuite chu Consumer Forum hmang tangkai tur leh inthlahrung hauh lova an lungawilohna zawng zawngte thlen thin turin a ngen a. Pu K. Lalthanmawia, General Secretary, District Consumer Protection Council in Consumer Forum hmalak tawh dante report pein hun a hmang thung.

He inkhawmah hian a duh apiangte tana thusawina hun hawn a nih bakah zaithiam Ni. Rodinliani, Lawngtlai –IV chuan kalkhawmte zaiin a awi bawk a ni.