1587/2026-2027

Dated Aizawl, the 30th July, 2026: Thawhtanni (i.e. 27th July 2026) khan Ministry of Corporate Affairs hnuaia Indian Institute of Corporate Affairs (IICA), Shillong chuan Mizorama ṭhalai, zirlai, MSME, professional-te leh enterprise-te pualin 'Corporate Mitra Scheme' chungchâng hriatzauna leh inzirtirna webinar a buatsaih. 

He webinar hi North East Region (NER) puala hmalakna 'Scheme’s Awareness Campaign' hnuaia hmalakna pakhat a ni a. Mizoram University (MZU) chuan Mizoram pual Webinar hi an buaipui a. The Institute of Cost Accountants of India (ICMAI) chu “Lead Co-host” niin, The Institute of Company Secretaries of India (ICSI) leh The Institute of Chartered Accountants of India (ICAI) te chu “Support Co-host” an ni.

Corporate Mitra Scheme hi Union Budget 2026-27 ah khan tlangzarh niin, Viksit Bharat @ 2047 thil tum tihlawhtling thei tura MSME (Micro, Small and Medium Enterprises)—a bik takin Tier-1 leh Tier-2 khawpuia mite tihchak leh chawikan tumna a ni a. MSME-te tana support ecosystem nghet tak siamnan mithiam bik “Corporate Mitra” te din a tum a. Graduate tharte industry-oriented knowledge leh practical skill zirtirin, MSME-te tan legal leh regulatory compliance, financial, taxation, accounting leh governance lam service buaipui sak tura thuam an ni ang. 

North East Region (NER) chhunga scheme kalpui leh tihlawhtling tur hian IICA-Shillong chu Nodal Agency atan ruat a ni a, State sorkar leh stakeholder hrang hrang (University, Association, Industry body, Institute-te) nen an thawk ho ang a. 'Corporate Mitra' Course atan hian July 15, 2026 aṭang khan registration hawn tan niin, July 31, 2026 thleng registration portal https://swayamplus.education.gov.in/courses/corporate-mitra hi a inhawng dawn a ni.

Officer on Special Duty (OSD), IICA Shillong leh Corporate Mitra Scheme (NER) Nodal Officer ni bawk Pu Debarun Kalita chuan webinar-a tel te lawmna thu a sawi a. Hmar-chhak bial (NER) pual bik atan he scheme hnuaiah hian seat 200 hawng hrang in, fee concession zaa sawmnga pek a nih thu a tarlang a. Hmarchhak bial leh a bik takin Mizoramah he scheme hi a hlawhtlin a pawimawh zia a sawi bawk.

School of Economics, Management and Information Sciences (SEMIS), Mizoram University Dean Prof. Vanlalchhawna chuan thu sawiin, he scheme hian Mizoram hmasawnnan nasa takin awmzia a nei dawn tih a sawi a, zirlai leh ṭhalaite chu he scheme hi chhawr ṭangkai turin a fuih a. ICMAI Vice President CMA Manoj Kumar Anand pawhin Mizoram chu NER chhunga economic growth hruaitu nih theihna a neih zia a sawi tel bawk.

Technical Session-ah ICMAI Managing Director CMA (Dr.) S.K. Gupta chuan scheme thil tum te, hmalak tum dan te, course structure leh eligibility te chipchiar takin presentation hmangin a hrilhfiah a, zawhna leh chhanna hun hman a ni bawk.

He webinar-ah hian Mizoram chhunga University leh College zirlaite, Entrepreneur leh ṭhalai 650 chuang an tel a ni.