Indian Institute of Entrepreneurship (IIE)  buatsaihin vawiin khan I&PR Auditorium-ah Stakeholders intawhkhawmna neih a ni a. He intawhkhawmna hmang tur hian New Delhi atangin India Infrastructure Finance Company Ltd. (IIFCL) Chairman cum Managing Director Pu SB Nayar chuan vawiin khan Aizawl a lo thleng a ni.

Meeting-ah hian Guwahati-a Indian Institute of Entrepreneurship (IIE) Director, Pu Manoj Kr.Das chuan kalkhawmte lawmna thu sawiin IIE Sr.Project Officer Pu Hemanta Rabha kaihhruaiin he intawhkhawmna hun hmang tura lokal sawm bikte lawmna hun an hmang a.  IIFCL Chairman SB Nayar bakah, ke leh kut lemsiamthiam Artificial Limbs Manufacturing Corporation ofIndiahotupa Lt.Col (Retd.) PK Dube te’n thu an sawi a ni. Mizoram Rural Bank Chairman Gautam Sen Gupta pawhin he hun hi a hmanpui a ni.

IIE hi Ministry Of Skill Development And Entrepreneurship hnuaia pawl pakhat niin hmar chhak state ah IIFCL-NSTFDC project an kalpui a. He project in a tum ber chu hmarchhak biala tlangmite chu kut themthiamna zirtira eizawnna tha tak an neih theihna tura dawmkan a ni a.  Skill development training buatsaih nan leh tribal hmeichhia puantaha eizawngte tanpui nan Ministry of Finance chuan sum a pe a. North East state hrang hranga tribal hmeichhia 25-te hnenah tunah hian Master Trainer te’n zirtirna an pe mek a ni. Kumin April 20atanga tan khan thla thum chhung awh tur skill development training chu Zuangtui Industrial Estate, TK Handloom Centre-ah neih a ni bawk