Chief Minister Pu Lal Thanhawla chuan ‘Anti Corruption Bureau (ACB) hi hlemhletna leh eirukna laka sorkar venpuitu tha tak a ni’ a ti. He thu hi vawiina New Secretariat Complex-a Anti Corruption Bureau office building thar a hawnna a a sawi a ni.

Chief Minister chuan ACB in office tha tak an nei ta chu a lawmawm hle a ni a ti a. Hetiang building sak tha tak mai an nei thei hi a sak hun chhunga officer ten uluk taka an vil thin vang a ni a ti a. Mizoramah contract hna a in sakte hi a sak laia enkawl that tawk loh avang leh vil uluk thin loh avangin a sak chhia a, mipuiin kan tuar thin a ni a ti a. Kan hnathawhna in te a that chuan phurna te pawh min pe thei a, kan theihna leh thiamnate pawh a pung thei a ni a ti.

Chief Minister chuan police ten building (police housing) an nei chau hle tih sawiin, hei hi central sorkarah pawh thlen tawh thin a ni a ti a. Building siam that leh chei that ngai battalion headquarters ah te tam tak a awm tih sorkar chuan a hria a ni a ti. ACB office thar hi a thar lai anga vawngfai reng turin thawktute chu chahin, inleng an neihte pawh faina lam hrilh hreh lo turin a chah a. Police hi mahni inthununna tha awmna hmun a ni tih hre reng tura chah bawkin, phai lamah chuan an hotute vak chhuakin an nau te an vil thin a, hei hian discipline mai bakah phurna a siam a, tha takin an hna an thawk thin a ni a ti a. Mizorah pawh kan ti ve thei a ni a ti. Police te hi mipui thlamuantu an nih rualin, misualte tan tihbaiawm an ni thung a, chutiang chuan hna an thawh angai a ni a ti. ACB hnathawk chhawr tlak an awm hi a lawmawm hle a ni a ti.

ACB building thar hi Rs.455.57 lakhs senga sak a ni a, chhawng ruk niin, a hmun luah zauh zawng hi 1843 sqm a ni. A satu hi class-I contactor Pu T.Thanzaua, Electric Veng a ni a, ni 23.02.2013 khan sak hna tanin, ni 28.02 2015 ah sak zawh a ni.

ACB hi ni 2nd Feb 1976 khan IGP enkawlna hnuaiah Anti Corruption Branch tia din a ni a. Kum 1981 ah Chief Vigilance Officer cum Chief Secretary hnuaiah dah leh a ni a. Kum 2008 kumtir khan Anti Corruption Bureau tia thlak in Chief Vigilance Officer enkawlna hnuaiah dah leh a ni. Tunah hian IPS officer Director in hoin, an vaiin hnathawktu police department atanga lakkhawm mi 84 an awm mek a ni. ACB hian hlemhletna leh eirukna chhuitu, criminal investigation hna thawkin intelligence agency ani bawk a ni. Anmahni puala building an neih hma zawng hian mimal in luahhawhin kum 40 dawn an awm a ni.

Hawnna inkhawm hi ACB Director Pu Virender Singh, IPS in a kaihruai a, Minister Pu R.Lalzirliana, Pu Lalsawta, Pu H.Rohluna, Pu P.C.Lalthanliana, Parliamentary Secretary Lt Col. Z.S. Zuala leh MLA Pu T. Sangkunga te an tel a, an ni bakah Chief Secretary Pu Lalmalsawma, IAS leh senior official engemawzah an tel bawk a ni.