Vawiin khan Minister C Ngunlianchunga chuan a Office Chamber-ah 'Lai Chieftanship and its impact in politics' tih lehkha bu Dr Jangkhongam Doungel Associate Professor Mizoram University ziak chu  a tlangzarh.

Minister chuan Lai chanchin ziaka vawn that reng theih tur leh khawvel pum puia chhiar theih tur a lo awm ta chu lawmawm tiin a ziaktu Dr J Doungel thawhrimna a fak a. Thangthar te tana hun inthlak thleng dan kimchang tak ziaka dah a ni chu Lai thangthar te tan malsawmna ropui tak a ni a ti. Lai hnam hi AD  750 atang tawh a China chhim atanga Brahmaputara leh Salwan lui hnar zawhthla a thlang tla niin, British sorkar in Chinzah Lal te Lalram inrelbawlnaah in rawlh em em lova anmahni a ro inrel turin a thlah zalen a, chu tih lai chuan Lai Lal rorel dan leh politics inkungkaihna zirbingna hi a la awmlo a ni, a ti a.  Lai hnam chu Kuki Chin Group Tibeto Burman family peng a mi an nih thu sawiin Lai Lal te hi tanbik neiloa mipuite enkawl leh khawtlang  relbawl kawngah nasa taka hma la thin an nih thu Pu C.Ngunlianchunga chuan a sawi a ni.

Lai te hi Nuai sawmhnih vel nia chhut niin Myanmar, India leh Bangladesh-ah te an cheng ber  a. Halkha leh Thantlang bik hi Lai hnam din chhuahna atan hmun pawimawh tak a ni a. Lai lal te chu  Chinzah, Zathang, Khenglawt, Hlawnchhing leh Hlawncheu an ni. Hranghlunchhung te pawh Zathang lal peng niin Hranglung-Zathang te hi Fanai Lal an ni a, an lal hmasa ber chu Thatinkuala  Chinzah niin AD 1700 khan a lo Lal tawh a ni.

He Lehkha bu tlangzarh inkhawm hi Prof. Vanlalringa Bawihtlung chuan kaihruaiin  Dr Jangkhongam Doungel chuan thuhmahruai a sawi a. Dr Malsawmdawngliana'n a bu chhung thu thlirlawkna hun a hmang a ni.