Vawiin  khan Health Department hnuaia Programme pahnih- NPCDCS (National Programme for prevention & control of Cancer, Diabetes, Cardiovascular Disease and Stroke) leh NPPCD ( National Programme for Prevention and Control of Deafness) te chuan Chanmari West Aizawl ah tunlaia natna lar (Non-Communicable Diseases) hrang hrang Cancer, Zunthlum, Lung natna, Heart Attack leh Stroke leh beng ri hriatna chungchangah mipuite zirtirna hun (Awareness Campaign) neiin a thlawna inentirna hun an buatsaih bawk.

Non-Communicable Diseases chungchang sawiin Dr. Eric Zomawia chuan tunlai khawvel changkang chho zelah mihring nunphung (Lifestyle) in a zir loh avangin natna benvawn hlauhawm tak tak, NCD (Non-Communicable Diseases) natna kan tih mai- Cancer, Zunthlum, Lung natna, Heart Attack leh Stroke vei leh thihpui kan tam ta tial tial tih hmuhchhuah a ni ta a. Heng natna te hian kumtin khawvelah thihna 63% thlenin mihring maktaduai 36 zetin kum tin an thihpui a ni, a ti a.  DR. Eric-a chuan awm awl lutuk a taksa sawi zawi ngai loh te, thau leh mawm leh thlum ei nasat luattuk, chi al ei tam lutuk, thlai leh thei ei tlem avang te, vaihlo leh zu lam chi tih nasat avangin heng natna te hi kan nei thei a ni, a ti. Natna benvawn, rei tak enkawl ngai, sum tam tak senso ngai an nih avangin khawvel pumah heng NCD natna te hian buaipui an hlawh tawh a. Mizoram-ah pawh heng NCD natna do tur hian NPCDCS Programme chu tan a ni tawh tiin CMO Office hrang hrangah NCD Cell siamin District Hospital leh CHC ah te NCD Clinic hi dah a ni a ti bawk.

Dr. Eric-a report-in a tarlan danin heng NCD Clinic ah hian zunthlum, BP sang, lungna leh cancer an vei leh vei loh endik sak thin a ni. Mipuite NCD natna laka an inven theih dan leh,cancer laka an inven dan tur te, a hmuhchhuah hma theih dan chungchangah zirtirna a pe bawk a ni.

Dr. K.Lalfakzuala, Radiation Oncologist hnen atangin Cancer awmzia leh inven dan bakah a enkawl dan ngaihthlak a ni a, Dr. Lalthanmawii Khalthang, Consultant (NPPCD) hnen atangin beng ri hriatna tha lo te enkawl kawnga NPPCD te hmalakna ngaihthlak ho a ni bawk.  Dr. Lalthanmawii Khalthang chuan NPPCD Programme chungchang sawi fiahin Mizo te zingah beng ri hriatna tha lo kan tam hle a, thawm ri bengchheng lutuk avang te, beng kan enkawl thiam loh avangte bakah pian tirh atanga beng tha lo sa pawh enge maw zat kan awm a ni, a ti a. Inven dan te, hmuhchhuah hma te leh he natna vei enkawl te chu he programme thil tum hi a ni a ti. Tunah hian thawktu mipui engemaw zat lak an ni tawh a. Beng enna leh beng enkawlna khawl engemaw zat lei chhoh mek zel a ni a, mipui ten hmang tangkai zel tura a duh thu a sawi bawk.

He Awareness Campaign zawh-ah hian Chanmari West High School-ah a thlawna inentirna hun buatsaih nghal a ni a. Mipui kalkhawm te hriselna endik sak nghalin BP Sang, zunthlum, cancer, ENT, FNAC, PAP Smear test sakin damlo mi 250 chuang he programme pahnih hnuaia mithiam te hian an endik sak a ni.

NPCDCS leh NPPCD te hian veng leh khaw hrang hrangah a tul dan angin Awareness Campaign leh Free Clinic nei turin hma an la chho mek zel a ni.