Nimin chawhnu khan Pu H.Rohluna Minister Geology & Mining chuan Maubuang bula Oil India Limited-in oil an zawnna hmun a tlawh a, an hnathawh dan a enpui. Minister hi Parliamentary Secretary Pu Joseph Lalhimpuia leh Col Z.S.Zuala te, School Education Director Pu K.Lalthawmmawia ten an tawiawm a ni.

Oil zawn hna thawktu Oil India Limited-a Geoligist ten an hna thawh dan Minister-te hi an lo hrilhfiah a.  Lei verh thui zawng tur an tinzawn 4500m ah vawiin thlenga an verh tawh chu 3945m a ni a, Lei chunglanga lung a chang hle a, an verh chak theih loh phah tih an sawi a, darkar khata 1.21m a chakin khawlin an verh mek a, chhun zan zawmin verh hna hi an thawk a ni. Hnathawktu nitin 150 vel an awm reng a, heng zingah hian tualchhung mi 20 chuang an awm  bawk.

Oil zawn hna an thawhnaah hian ni khata company-in an senso chu chawhrualin cheng nuai 14 vel a ni a. Lei verh thui zawng tura an ruahman 4500m hi an verh thlen hunah chuan gas emaw oil emaw hmuh theih an beisei a, gas a awm theih beiseina  a lian zawk tih an sawi a. 4500m an verh thlen hunah oil an hmu lo anih chuan lai chhunzawm lovin helai hmun hi an chhuahsan mai dawn niin an sawi bawk.

Khawlin lei chhung  a verhnaah a verhna bit leh lung innawk chu a sa  hle a, degree Celsius 50/60 te a kai pha a ni. Hemi sa tak  tidai tur hian chirh an siam a, chu chu an kaplut thin. Lei chhung atanga lung nawi an verh chhuahah oil a awm leh awm loh uluk takin an en dik reng a, oil emaw gas emaw an hmuh phawt chuan a awm na chin chu uluk takin an chhinchhiah ang a, engtia zau leh thuka awm nge tih te an hriat theih hnuah a lakchhuah tak tak chu a thawh theih dawn chauh a ni, Oil laihchhuah hi a process a rei avangin laihchhuah anih atanga kum 7 hnuah chuan a hman theih an beisei thu thawktute hian an sawi bawk.