Vawiin khan Mizoram Legislative Assembly Deputy Speaker Pu R.Lalrinawma chuan Sihphir Higher Secondary School atanga HSSLC, 2015 a pass tharte lawmpuina hun Sihphir Arpu YMA Conference Hall-ah a hmanpui.

Pu R.Lalrinawma chuan tunlai khawvelah zirna kawnga inelna a sang tawh hle a, mi aia thawkrim leh ti tak tak tan lo chuan hlawhtlin a har tawh hle a ni tiin tan la thar sauh sauh turin zirlaite a fuih a. Lehkha zir hun laia thiam thei tak, an lungawi hma luat avanga mahni nih tur ang ni phak lo an awm fo va, chuvangin tum sang tak neia lehkha zir turin zirlaite a chah a ni. Tawng thiam chungchangah Mizo zirlaiten tan lak thar an mamawh nia hriain Hindi a ni emaw English a ni emaw, a pawimawhzia hria a thiam tum ngei turte, tunlai thiamna avanga remchanna tam tak an neih internet-te a tha zawnga hmang tangkaia, an zirlai puitu atana hmang thiam turin Minister chuan zirlaite a chah a ni.

HSSLC pass tharte lawmna hun hi Sihphir Higher Secondary School Managing Board Chairman leh Village Council President ni bawk Pu Laldingluaia’n a kaihruai a. Kum 2008, June 22 a din he school atang hian kumin HSSLC result chhuakah khan an candidate-te an pass vek a. 1st Division-ah 4, 2nd Division ah 3, 3rd Division ah 3 an pass a ni.