School hi certificate neihna tur mai a ni lova, hun lo kal zel tur atana training ground a ni Pu Joseph Lalhimpuia chuan a ti. Hemi chungchang hi Tlungvel HSS pass lawmna a hman puinaah a sawi a. Tlungvel Higher Secondary school-in kumin result chhuaka 100% an pass lawmna inkhawm vawiina neihah hian  Pu Joseph Lalhimpuia chuan zirlaite chu zirna in chuan enge a pek dawn tih ngaihtuah a, certificate ringawt ni lo, skill tha thiamna tak tak puakchhuah nana hmang turin a fuih.

Zirlaite chu ram khawtlang leh Kohhran nghahfak an ni tih hrilhin tuna mite mual kan liam hunah an hun a lo thleng ngei ngei dawn a, chumi huna midangte tana malsawmna ni turin a chah bawk.

School Education Director Pu K. Lalthawmmawia pawhin he hunah hian hnam dinchhuah nan leh khawtlang changkan nana lehkha thiam turin zirlaite a fuih a. Mi hlawhtlingte hi midang hmuh loha bei hah an ni thin tih sawiin  zirlaite chu lehkha chhiar leh zir uar turin a chah a ni.

Tlungvel HSS hi khawtlangin May 4, 2010 a an din a ni a, an din atang hian kum 4 chhung chu zaa za an pass a, kumin result chhuakah khan candidate 16 an nei a, an pass vek a, tunah hian zirlai 69 an nei mek a ni.