Vawiin khan Zotuitlang YMA Education Sub-Committee buatsaihin an khuaa zirlai tithate lawmpuina hun hman a ni a, Lunglei HPC Vice-Chairman Pu S.Laldingliana chu Khuallian niin zilrai tithate hnenah lawmpuina thilpek a hlan a ni.

Zirlai tithate lawmpuina inkhawm Zotuitlang YMA Education Sub-Committee Chairman Pu K.Zolawmsiama kaihhruaiah Khuallian Pu S.Laldingliana chuan zirna huangah kumin hi chhimlam tan kum danglam leh chhinchhiahtlak tak a ni a ti a. Ram leh khawtlang hmasawn tak tak tur chuan zirna ngaih pawimawh leh lehkhathiam chherchhuah tam a tul a, Zotuitlang chu in 100 vel lek awmna khua ni mahse zirna lamah an tanlakna a fakawm hle a, khaw dangte tan pawhin entawntlak ni thei a ni, a ti. Zirtirtute fuihin Pu S.Laldingliana chuan an zirlai naupangte chu an ‘file’ pawimawh ber an ni a, chuvangin zirlaiten an lehkha zirna kawnga phur tak leh lehkhathiam ni chak tura boruak siam thiam turin a chah a. Zotuitlang atanga HSLC 1st Division-a pass hmasa ber V.Zodinsangi leh HSSLC 1st Division-a pass hmasa ber Lalrindiki chu Khuallian hian lawmpui nan Rs.1000/- ve ve a pe a. Zotuitlang YMA hnenah Jersey set 1, football, volleyball & net a pek bakah Zotuitlang MHIP ten an MHIP Day hmanna tur Rs.5000/- a pe bawk a ni.

Kuminah Zotuitlang atangin HSLC Exam-a hlawhtling zirlai 9 leh HSSLC Exam-a hlawhtling zirlai 2 an awm a, HSLC leh HSSLC Exam-a 1st Division-a pass an neih hmasak ber kum a ni nghe nghe a. Anni bakah hian Zotuitlang khuaa sikul pathum awm-Govt. Primary School, Govt. KLM Middle School leh Govt. Aided High School-a Class tina nikum final exam-naa 1-na atanga 3-na hauhte hnenah lawmpuina Certificate leh thilpek hlan a ni.