Vawiin khan Social Welfare Minister Pu PC Lalthanliana leh AH&Vety Minister Pu C.Ngunlianchunga te chuan St.Joseph Higher Secondary School atanga HSSLC pass tharte lawmpuina hun Ramhlun Indoor Stadium-ah an hmanpui.

Pu PC Lalthanliana chuan zirlai pass tharte chu an hmaa kawng thui tak la awm zawh chhuak thei turin an inpuahchah a tul a ni tiin hlawhtlinna kalkawngah hlawhchhamna a awm tel fo va, hlawhchhamna hi beidawnna ni lovin hlawhtlinna rahbi atana hmang tangkai zawk turin zirlaite a fuih a ni. Mahni thawh duh zawng leh tui zawng thlan thiam a pawimawhzia sawiin tun atanga tum fel tak neia lehkha zir turin a fuih a. Sawrkar hna hmuh ringawt hi hlawhtlinna a ni lova, thiamna hi a bul ber leh a pawimawh ber a ni a, eng hna pawh thawk dawn sela, hlawhtling turin thiamna an neih a tul tiin khuallian chuan zirlai kalkhawmte taimakna leh rinawmna nen, ram tana chhenfakawm nih tum theuh turin a chah a ni.

Pu C.Ngunlianchunga pawhin zirlai hlawhtling tharte lawmpuiin thawhrimna, tuarchhelna, tumruhna nen an hmaa tihtur awm apiang hmachhawn turin a chah a. Degree hlawhchhuah ringawt a tawk lova, thiamna an puak chhuah rualin rinawmna, aia upa zahthiamna, Mizo nunmawi zirchhuak tel tur leh zirtirtute pawhin an zirlai te nun kawng dik kawhhmuh turin Minister chuan a fuih a ni.

Pass tharte lawmpuina inkhawmah hian SCERT Director Pi Malsawmthangi, St Joseph Hr.Sec.School Managing Board Director Pu H.Rotluanga te’n thu an sawi a, Principal Pu C.Laltlansanga chuan kalkhawmnate lawmna thu a sawi bawk a ni.

Kum 2003 a din St.Joseph Higher Secondary School ah hian zirlai 570 chuang awmin zirtirtu 42 an awm a. Kumin HSSLC result chhuakah khan an school atanga candidate zawng zawng an pass vek a. Arts Subject ah Lalduhsaki chu Mizoram pumah 3-na niin Commerce ah Lalruatfeli Ngente chu pasarihna a ni.