Indian Institute of Mass Communication (IIMC) Mizoram Centre a zirtirtute leh zirlaiten Chief Minister Pu Lal Thanhawla chu a office ah vawiin khan an hmu.

IIMC Mizoram Centre hi Prof. Srivastavas an hovin, teaching faculty member dang 3 leh zirlai 7 te an ni a, anni bakah hian IIMC Mizoram Centre a Special Officer Pu L.R. Sailo pawh a tel.

Chief Minister chuan IIMC hotute leh zirlaite chu lo lawmin, Mizoramah zirna sang zawk NIT te, IIMC te, IIM te leh Medical College te din anih theih nana nasa taka hma a lak thute alo hrilh a. Mizoram mipuite tana a hmalakna chuan rah a rawn chhuah tan mek a ni a ti a. Pu Hawla chuan Mizoramin State dang atanga zirlai neih ve hi hun rei tak atanga kan lo thlir thin, tunah an hmel hmuh theiha a awm ta chu thil lawmawm tak a ni a ti a. Mizo zirlai dangte nen pawha intawhkhawmna hunte siam a, atute pawhin hlawkna tha tak an neih theih nan leh chumi chuan ram inpumkhatna tluantling  a rah chhuah ngei  a beisei thu a sawi a. Mizoram atanga zirchhuak ngei ten India ram tana mi chhenfakawm an nih ngei a beisei thu hrilhin, duhsakna a hlan a ni.

IIMC Mizoram hi kumin 2011 August ni 8 khan zirlai 7 neiin class urhsun taka tan alo ni tawh a. Zirlai naupangte hi All India Entrance Exama tlingte niin, Punjab, Bihar, U.P., Goa, Sikkim leh Mizoram atangte a kal an ni a. Tunah hian Mizoram University (MZU) Campus-ah building hran neiin class hi an nei thin a. Zirlai hmeichhiate hi MZU Girls Hostel-ah awm ve in mipa te hi NIT Mizoram Hostel (Saizahawla Boarding), Tanhril-ah an awm bawk a ni. Zirtirtu Professor hi Visiting Professor & Mentor niin, ani bakah hian Teaching Associate in Computer leh Lecturer 2 an awm bawk a, office lama hnathawk 2 an awm bawk a ni. Special Officer Pu L.R. Sailo hian Establishment zawng zawng a enkawl thung a ni.

IIMC hi kum 1965 khan Ministry of Information and Broadcasting hnuaia din a ni a. Kum 1966 khan Societies Registration Act,1860 ah autonomous body anga in ziak lutin, India sorkar hnuai I&B Ministry kaltlanga enkawlin a awm chho ta a ni. IIMC Mizoram Centre hi nikum khan Amravati (Maharashtra) nen dinin, Post Graduate Course in English hmasa ber chu kumin Aug ni 8 khan tan alo ni ta a ni.