36^th India International Trade Fair (IITF) 2016 New Delhi a neih (14.11.2016-27.11.2016) takah Mizoram aiawhin Commerce and Industries Department chuan Mizoram Pavillion a buatsaih a, Mizo puantah leh thiam thil hrang hrangte phochhuakin dawrtu mai bakah ngaihventu leh order nghaltu engemaw zat an hmuh avangin entrepreneurs bakah Department lam pawh an lawm hle a ni.

IITF 2016 hi President Pranab Mukherjee-a’n November ni 14, 2016 khan hawng in, November ni 27, 2016 khan an tiak a. He Trade Fair ah hian Ram hrang hrang bakah sawrkar laipui ministry leh state sawrkar atanga sumdawng ten dawr 7000 zet an hawng a, Mizoram Commerce and Industries Pavilion-ah dawr 11 hawn a ni. IITF 2016 hawnna hi Commerce and Industries Minister Pu H. Rohluna’n hmanpuiin, Parliamentary Secretary Pu Joseph Lalhimpuia’n a kharna a tel pui a ni.

Pu Joseph Lalhimpuia chuan Mizo entrepreneurs ten hmasawnna tam tak an neih belh zel bakah state pawn lam pawhin an ngaihven ta viau chu lawmawm a tih thu a sawi a, quality tha leh mi hip zual thei tura tan la sauh sauh turin a fuih a, sawrkar chu an tan a ding a ni tih hre reng turin a chah nghal bawk.